СВЕТСКА НЕДЕЛА ЗА РАЦИОНАЛНА УПОТРЕБА НА АНТИБИОТИЦИ: Вирусни инфекции, настинки и грип, вклучително и Ковид-19 не се лекуваат со антибиотици

Темата на овогодинешната недела за подигање на свеста за рационалната употреба на антибиотиците е „Ширете свесност, спречете отпорност“

Доколку продолжи трендот на ширење на резистенција, резистентните бактерии до 2050 година ќе бидат водечка причина за смртност во светот

Секоја година во светот умираат околу 700.000 луѓе како резултат на инфекции со бактерии отпорни кон повеќе антибиотици, проценуваат од Светската здравствена организација. Речиси 33.000 луѓе во земјите на Европската унија умираат од инфекции предизвикани од бактерии кои се отпорни на антибиотици, а доколку продолжи трендот на ширење на резистенција, резистентните бактерии до 2050 година ќе бидат водечка причина за смртност во светот.

СО СЕКОЈА ДОЗА НА АНТИБИОТИЦИ, ТЕЛОТО СЕ МЕНУВА

Вирусни инфекции, настинки и грип, вклучително и Ковид-19, не се лекуваат со антибиотици.

Погрешното и прекумерно препишување, како и неправилната употреба на антибиотици, ја поттикнуваат отпорноста на бактериите на оваа важна група лекови, што го зголемува ризикот од развој на други болести и зголемување на смртноста. Антибиотиците се користат за уништување на опасните бактерии и значително придонесуваат за здравјето на луѓето. Болестите кои некогаш биле смртоносни сега можат успешно да се излечат со земање антибиотици. Сепак, многу бактерии станаа отпорни на антибиотици. Тие можат да преживеат и да се размножуваат дури и во присуство на антибиотици.

Отпорноста на бактериите на антибиотици може да стане навистина голем проблем, па затоа е многу важно антибиотиците да се земаат внимателно и само кога е неизбежно. Под слоганот „Ширете свесност, спречете отпорност“ од 18 до 24 ноември се одбележува Светската недела за подигање на свеста за рационалната употреба на антибиотиците.

Користете ги паметно. Немојте да земате антибиотици секогаш кога имате инфекција на дишните патишта. Антибиотиците нема да ви помогнат кај вирусните инфекции, како што се грип, настинка или болки во грлото.

Не вршете притисок врз докторот. Не инсистирајте вашиот лекар да ви препише антибиотици ако е очигледно дека страдате од вирусна инфекција. Наместо тоа, побарајте совет кој ќе ви помогне за вирусната инфекција да помине што е можно побрзо.

Земајте ги антибиотиците правилно. Доколку ви се препишани антибиотици, следете ги упатствата за нивно земање. Довршете ја целата доза на антибиотици, дури и ако се чувствувате подобро.

Никогаш не земајте антибиотици без рецепт. Ако употребувате антибиотици кога всушност не ви се потребни, голема е веројатноста бактериите да развијат отпорност на антибиотиците.

Секоја година во светот умираат околу 700.000 луѓе како резултат на инфекции со бактерии отпорни кон повеќе антибиотици, проценуваат од Светската здравствена организација

Како бактериите развиваат резистенција на антибиотици?

Бактериите можат да развијат отпорност спрема антибиотиците, што може да биде опасно по здравјето на целиот организам. Најчестите причини за отпорност на бактериите на антибиотици се:

  • пречесто земање антибиотици;
  • непотребно земање антибиотици;
  • предвремено прекинување на земање антибиотици.

Непридржување кон правилата и упатствата за земање антибиотици

Кога антибиотиците се земаат премногу често и неправилно, тие ќе ги уништат поосетливите бактерии, но не и поотпорните. Поотпорните бактерии ќе продолжат да се размножуваат и да се шират низ телото. Тие можат да останат во телото многу долго и да развијат отпорност на антибиотици. Бактериите се многу отпорни, тие можат:

  • Да го неутрализираат дејството на антибиотиците;
  • Да го променат подрачјето на делување на антибиотиците;
  • Да ги исфрлат антибиотиците од своите клетки;
  • Да го спречат влегувањето на антибиотиците во нивните клетки.

Антибиотиците треба да се избегнуваат колку што е можно повеќе. Може да предизвикаат појава на несакани ефекти со кои можете да се борите со недели подоцна. Често предизвикуваат запек, дијареја, габична инфекција, промени во расположението и слаба концентрација.

Антибиотиците ги уништуваат и добрите бактерии. Во нашето тело постојат различни видови бактерии, а телото без некои од нив не може нормално да функционира. Тоа се добрите бактерии кои му овозможуваат на телото да функционира непречено. Антибиотиците ја нарушуваат оваа рамнотежа во повеќето случаи.

Истражувањата покажале дека земањето антибиотици може да го зголеми ризикот од развој на некои болести подоцна во животот. Со секоја доза на антибиотици, телото се менува. Антибиотиците ги уништуваат нормалните бактерии, кои се составен дел од нашето тело.

  • ПРОЧИТАЈТЕ И…

Момчињата растат побавно ако примале антибиотици кога биле новороденчиња