Изливите на бес веројатно се еден од најпредизвикувачките делови од родителството со мали деца. Доволна е и најмала ситница за да предизвика целосен емоционален „слом“: погрешно исечено јаболко, „погрешна“ лажица за вечера или јогурт што сте го отвориле наместо нив.
И додека родителите во такви моменти често се чувствуваат беспомошно, сѐ повеќе експерти советуваат понежен пристап што му помага на детето да се чувствува видено и сигурно.
Една од нив е социјалниот работник и едукат за родители Џен Миур, мајка на четири момчиња, која на социјалните мрежи сподели едноставна техника за која тврди дека може да смири тантрум за само неколку секунди.
Таа се присетува на ситуација кога нејзиниот двегодишен син дошол во кујната и ја замолил да му излупи банана. Додека ја лупела, бананата се скршила на половина – и настанал хаос.
„Секој родител на двегодишно дете знае колку е тоа голема грешка“, се пошегувала таа.
Детето повеќе не ја сакало таа банана и барало нова, но други банани немало. Почнало да плаче и да вреска, а Ген се обидувала да му го одвлече вниманието нудејќи му други грицки. Ништо не помагало.
„Чувствував како стресот расте и како станувам сѐ полута“, признала таа. „Сакав да извикам: ‘Оди во својата соба!’“
Но, како експерт за родителство, знаела дека тоа нема да помогне ниту нејзе ниту на детето. Тогаш се потсетила на нешто важно:
„Не морам да го поправам ова. Не морам да го решам проблемот. Само треба да му покажам дека го разбирам.“
Седнала покрај синот на подот, длабоко вдишала и му кажала три едноставни реченици:
- „Бананата ти се скрши.“
Именување на тоа што се случило. - „Не сакаше тоа да се случи.“
Признавање на желбата и разочарувањето на детето. - „Многу си тажен поради тоа.“
Препознавање и потврдување на емоцијата.
Миур вели дека нејзиниот син веќе по неколку секунди ја потпрел главата на нејзиното рамо, а кратко потоа сепак ја изел скршената банана.
Таа сфатила дека на децата им е многу полесно да се справат со емоциите кога некој ги прифаќа, наместо да се обидува да ги замолчи, поправи или игнорира.
„Понекогаш само треба да слушнат: ‘Те гледам, те разбирам и знам дека би сакалo да биде поинаку.’“
И искрено, звучи како нешто што вреди да се испроба следниот пат кога ќе настане драма поради погрешна лажица или колаче што се скршило на половина.
