Ограниченото движење и општата несигурност што ја предизвика пандемијата со коронавирусот, оставија последици по менталното здравје на многумина, а најмногу на младите.
Според извештаите на француските психијатри, во изминативе месеци во оваа земја голем број на тинејџери побарале психијатриска помош. Од почетокот на пандемијата, бројот на хоспитализации на лица помлади од 15 години, е зголемен за 80 проценти.
Сличен тренд е воочен и во Белгија. Проф. Мари Деле од Еразмус болницата во Брисел вели дека на психијатриското одделение за деца и млади, бројот на консултации од септември минатата година е двојно зголемен. Постоја дури и листи на чекање, бидејќи нема доволно псохијатри за да сите на кои им е потребна помош веднаш дојдат на ред.
Според нивните искуства, најголем број од младите се соочуваат со анксиозност и чувство на беспомошност, но има и такви со сериозни проблеми, како пореметувања во исхраната или депресии и психози.
Менталната состојба кај тинејџерите значајно е влошено поради новите околности во кои спаѓа учењето од дома, изолираноста од пријателите, но и откажувањето од бројни хобија кои ги правеле среќни. Исто така, младите се погодени и со проблемите со кои се соочуваат нивните родители, како финански, но и оние по смрт на некој близок.
Во САД податоците покажуваат дека дури 46% од родителите велат дека нивните тинејџери за време на актуелната криза покажувале или покажуваат знаци на влошување на менталното здравје.
Во многу земји низ светот, младите се соочуваат со некои до неодамна релативно ретки нарушувања. На пример, кај помладата популација, бројот на фобии поврзани со нечистотија, микроби и бактерии е зголемен, па многу од нив се опседнати со личната хигиена. Зголемен е и бројот на напади на паника, но и зависноста од мобилни телефони и други уреди.
Поради тоа, психијатрите редовно апелираат до родителите да и покрај многубројните обврски, одвојат време да разговараат со своите деца, но и да ги набљудуваат дали има некои промени во нивното однесување и, доколку е така, да ги информираат лекарите.
