За само три месеци, омикрон стана доминантна варијанта ширум светот. Новата варијанта е одговорна за повеќето новозаразени со Ковид-19 и на почетокот предизвика голема паника. Олеснување донесе сознанието дека новата варијанта не води до тешки симптоми како оние предизвикани од делта и другите претходни соеви, поради што ризикот од хоспитализација и смрт е помал, пишува „Тајмс оф Индија“.
Кога станува збор за инфекција со омикрон, болката може да се почувствува на двете страни на главата. Целата глава може да биде напната и болна
Симптомите на омикрон се слични на симптомите на обичната настинка и главно се однесуваат на течење на носот, болки во грлото, болки во телото, болки во градите, замор и главоболка.
Според едно британско истражување, главоболката е меѓу првите пет симптоми кои се јавуваат кај заразените со омикрон. Главоболките обично се јавуваат кај луѓето секојдневно од различни причини, но онаа што ја предизвикува омикрон е специфична. Тоа е трајна главоболка која често е придружена со други симптоми како што се течење на носот, болки во грлото и замор. Во продолжение – три специфики по кои оваа главоболка се разликува од другите.
Умерен до јак интензитет
Интензитетот на главоболката зависи од тоа што ја предизвикува. Може да биде блага ако е предизвикана од работен притисок и може да биде сериозна ако е предизвикана од мигрена. Во случај на инфекција со омикрон, главоболката е генерално умерена до јака. Се чувствува како пулсирање, притисок или убод, што е невообичаено во случај на општа главоболка. Покрај тоа, главоболката предизвикана од варијантата омикрон трае и до три дена, дури и ако редовно земате лекови против болки.
Се јавува на двете страни
Ако некогаш сте обрнале внимание, понекогаш главата ве боли само од едната страна или на еден дел. Областа на болка при главоболка исто така зависи од предизвикувачите на вашата главоболка. Кога станува збор за инфекција со омикрон, болката може да се почувствува на двете страни на главата. Целата глава може да биде напната и болна.
Често придружена со воспаление на синуси
Според експертите, главоболката во случајот на омикрон може да биде воспалителна реакција на телото додека се бори против вирусот. Како што вирусот се размножува во респираторниот систем, тој влијае и на синусите, што доведува до воспаление. Така, главоболката обично се јавува со воспаление на синусите. Ако страдате од проблеми со инфекција на синусите, вашата главоболка може да биде полоша.
