Со доаѓањето на убавото време и сонце сè почесто излегуваме во природа, а тоа со себе носи и ризик од консумирање неизмиено овошје, расипана храна или валкани раце. Сите овие се можни причини за стомачни проблеми.
„Обично по контакт со инфективен агенс, вирус или бактерија, симптомите започнуваат по 2-3 дена: повраќање, појава на ретки столици, болки во стомакот и често покачена температура. Симптомите обично почнуваат нагло“, вели д-р Александра Вуков, педијатар, супспецијалист пулмолог-алерголог и клинички имунолог.
Во зависност од причината, тегобите обично траат од неколку до седум дена, а во некои случаи и до две недели. Ако детето често повраќа и има чести ретки столици, може да дехидрира
Докторката вели дека кога детето ќе покаже симптоми се препорачува посета на педијатар каде по преглед на детето и проценка на општата состојба ќе се направи анализа на крвта и ќе се советува преглед на столицата кој вклучува преглед на бактерии (копрокултура) или брзи антигенски тестови за детектирање на најчестите вируси како што се рота, адено, астро и норо вирус.
Можни патишта на инфекција, како што вели д-р Вуков се: преку контаминирана храна или течност, допирање на заразени површини или предмети, директен контакт со друго лице…
„Во зависност од причината, тегобите обично траат од неколку до седум дена, а во некои случаи и до две недели. Ако детето често повраќа и има чести ретки столици, може да дехидрира“, предупредува докторката и ги наведува знаците на дехидрација:
– зголемена жед,
– суви усни,
– бел јазик,
– плачење без солзи,
– вдлабнати очи,
– бледа кожа,
– вдлабната фонтанела кај бебињата.
„Децата тогаш обично се раздразливи, уморни, поспани и незаинтересирани. Доколку препознаете некој од овие симптоми, неопходно е да се оди на преглед во здравствена установа, каде по направени лабораториски тестови ќе се стави инфузија за да се надомести изгубената течност и електролити“, предупредува д-р Вуков.
Терапијата, како што вели, вклучува внесување на средства за рехидратација, пробиотици и полесна храна во форма на помали и почести оброци. Многу ретко се вклучени антибиотици.
Исхрана за време на стомачниот вирус
Исхраната за време на траењето на инфекцијата зависи од возраста на детето, како и од тежината на клиничката слика. Доколку детето има благи форми на инфекција, не повраќа и нема гадење, тогаш се препорачува терапија со пробиотици и продолжување на вообичаената исхрана поделена на помали оброци, како и следење на внесот на течности.
„Опоравувањето трае неколку дена, по што детето се враќа на вообичаената исхрана“, заклучува д-р Вуков.
Како најдобро да се заштитите?
За да се заштитиме од инфекција, препорачливо е храната да ја земаме од проверени места, да е свежа и термички обработена, да ги миеме рацете пред да ја допреме храната и пред јадење, за да ја намалиме можноста за зараза колку што е можно повеќе. (Н1)
