Родителите постојано им даваат на своите деца различни информации кои првенствено служат како дел од воспитувањето, Но, она што го кажуваат или попатно го прават, децата го слушаат и усвојуваат и повеќе од она што директно го добиваат. Децата не знаат што се случува во главата на нивните родители, па затоа е важно одредени ситуации да им се објаснат на глас. Таквиот пристап помага за подобро градење на емоционалната интелигенција и регулација на детето, го учи да се однесува со другите, да изразува емоции и ранливост и да прифаќа вина. Важно е родителите неискажаните работи да ги кажат на глас и на девојчињата и на момчињата, но бидејќи покажувањето ранливост и емоции традиционално помалку се поттикнува кај машките деца, важно е момчето да слушне некои од овие работи од својот татко.
- Убави зборови за мама
Прекрасно е да и кажете на партнерката дека ја сакате пред детето, но таа изјава можете да ја поткрепите со примери и да му објасните на детето зошто ја сакате неговата мајка. Кога ќе има ситуација да таа прави нешто убаво за вас, кажете го тоа гласно и дајте и комплимент пред детето за да забележи дека ја цените нејзината грижа и љубов.
- Вистината за тешките моменти
Важно е татковците да им кажат на своите синови за работите кои не одат според планот и кои не ги направиле како што замислиле. Наместо да пцуете или да се нервирате кога нешто ќе тргне наопаку пред вашето дете, кажете му дека сте се згрешиле и дека поради тоа сте фрустрирани. Исто така, коментирајте што следниот пат ќе направите поинаку. Вака му покажувате дека е во ред да греши и дека околу тоа не треба премногу да се вознемирува и дека е добро да се учи од своите грешки.
- Изразување емоции
Изразувањето среќа е добро, но искажувањето на тага или грижа е исто толку важно. Покажете им на вашите синови дека ранливоста е природна и дека секоја емоција е вредна, иако некои не се пријатни.
- Барање помош
Покажете му на вашиот син дека е во ред да побара помош. Тоа не мора да се епски гестови, доволно е да ја замолите партнерката, пред детето, да ви ја провери поштата или да го замолите пријателот да ви го измасира рамото што ве боли. Така детето ќе научи дека неговиот татко е доволно силен и паметен за да знае да препознае кога нешто не може сам и дека во животот е важно да се потпира на луѓето и да бара помош.
