ВОДИЧ ЗА ТРУДНИЦИ: Што е кардиотокографија (ЦТГ)

Доколку за време на ЦТГ не се регистрираат варирања во срцевите отчукувања паралелно со контракциите на матката, методата се повторува уште еднаш, со тоа што на бремената жена и се кажува да се раздвижи и да се напие течности.

Кардиотокографија (ЦТГ) претставува паралелно електронско следење на работата на срцето на бебето и контракциите на матката. Се спроведува за време на бременоста како и во текот на породувањето. По препорака на гинекологот, најчесто ЦТГ се прави во третиот триместар. Неговата примена дава податоци за состојбата на бебето во матката, дали бебето добива доволно кислород преку плацентата. Исто така, ЦТГ записот покажува како контракциите на матката влијаат врз срцевата работа на бебето.

Како се прави?

Кардиотокографијата претставува едноставна и безболна метода. Се поставуваат две сонди на стомакот на бремената жена кои се зацврстени со еластичен појас. Едната сонда ја следи работата на срцето на бебето, додека другата го мери интензитетот честотата, и времетраењето на контракциите. Со цел да се добие подобар сигнал, стомакот се премачкува со гел. Времетраењето на ЦТГ тестот зависи од моменталната состојба, но најчесто доволно време за да се види состојбата на бебето е 20 минутен запис.

Работата на срцето и контракциите на матката се запишуваат во вид на графички шематски запис на хартија, а може да се зачува и на компјутер за понатамошно иследување. Срцевите отчукувања на бебето најчесто варираат од 110 до 160 во минута. Срце на бебето работи многу побрзо од вашето и тоа е нормално. 

Времетраењето на ЦТГ тестот зависи од моменталната состојба, но најчесто трае 20 минути.

Доколку за време на ЦТГ не се регистрираат варирања во срцевите отчукувања паралелно со контракциите на матката, методата се повторува уште еднаш, со тоа што на бремената жена и се кажува да се раздвижи и да се напие течности.

Според добиениот приказ од кардиотокографијата, гинекологот прави проценка на состојбата на бебето во матката. Во случај да се регистрираат родилни контракции, а не сте во близина на терминот, тогаш можно е ова да се знаци за предвремено породување, па гинекологот ќе ви препише кортикостероиди за забрзан развој на белите дробови и што побрза подготовка на бебето за надворешниот свет. Доколку приказот е во ред, тогаш гинекологот ќе ви каже кога да го направите следната рутинска кардиотокографија. Доколку постои каква било причина која наведува дека бебето не добива доволно кислород преку плацентата, тогаш ќе биде потребно да се започне со подготовка за чинот на раѓање.