Зошто доаѓа до појава на запек и што е нормална столица кај децата?

Што ако вашето дете има тегоби за време на празнењето или одбива да изврши нужда? Сакате да му помогнете, но детето и наматму ја потиснува столицата и го влошува запекот. Неретко мора да побарате и помош од педијатар.

Што е “нормално“?

Нормалната столица кај бебе кое се храни со мајчино млеко е со златно-жолта боја, зрнеста и со киселкаст мирис. Детето може да има столица по секој подој или да изостане цела недела. Доколку детето е задоволно, цица и напредува секоја зачестеност на столицата се смета за нормална.

Бебе кое се храни со адаптирано млеко има поцврста, посветла столица која позеленува ако се задржи во пелената поради оксидираното железо во формулата.

Дете кое е на мешана исхрана има една столица во 2-3 дена, детето не се напрега и нема тегоби за време на дефекацијата (празнење).

Што е опстипација или запек?

Опстипација е отежнато празнење, столицата е тврда, сува, исфрлањето е болно и доаѓа до насобирање на штетни материи во организмот. Честа причина за појавата на опстипација е исхраната без целулоза, растителни влакна и недоволен внес на течности, особено во летниот период.

До појава на опстипација може да дојде и ако рано се обидувате да го одвикнете детето од пелени, тогаш може да дојде до “потиснување“ – кога детето свесно ја задржува столицата која затоа станува тврда, празнењето е болни и може да дојде до прскање во пределот на анусот – фисура која понатаму го потенцира потиснувањето и опстипацијата.

За решавање на проблемот родителите често применуваат клизми, чепчиња и други поагресивни лаксативи кои може да предизвикаат грчеви при празнењето, а подолга примена може да доведе до мрзливи црева и други пореметувања кои ја влошуваат опстипацијата.

Педијатрите ги советуваат родителите за редовна столица и спречување на појава на запек да направат корекција на исхраната на детето со поголем внес на овошје, зеленчук и вода.