Медицинските експерти во Велика Британија наведуваат дека грипот е речиси целосно збришан, бидејќи бројот на заболени опаднал за 95%, пренесува „Сандеј тајмс“.
- Според податоците, бројот на заболени од грип дијагностициран од лекарите изнесува 1,1 на 100 000 луѓе, во споредба со претходниот петгодишен просек од 27 на 100 000 луѓе
Податоците се врзани со втората недела на јануари, што е обично врв во сезоната на грип, кога илјадници лица се хоспитализирани. Ниту еден пациент во Англија не бил примен во болница кон средината на јануари годинава поради грип.
„Не можам да се сетам на ниту една година кога се случило нешто слично“, вели Симон де Лусињан, професор по примарна здравствена заштита на Универзитетот во Оксфорд.
Џон Макаули, директор на центарот на Светската здравствена организација во Лондон, рече дека овие бројки се без преседан.
Професорот Мартин Маршал од Кралскиот колеџ во Лондон, смета дека големиот број на мерки преземени во борбата против COVID-19 се веројатно клучниот фактор во падот на бројот на заболени од грип.
