Зошто кај младите мажи до 24 години се јавува воспаление на срцевиот мускул по втората доза вакцина против КОВИД-19

Поголем број на млади, отколку што се очекувано, имале воспаление на срцевиот мускул по втората доза на mRNA вакцината против КОВИД-19  на компанијата Фајзер/Бионтек и Модерна, покажале податоците од два система што ја следат безбедноста на вакцината.

Како што објави Центарот за контрола и превенција на болести на САД (CDC), тие и други здравствени регулатори го истражуваат прашањето за воспаленијата на срцевиот мускул, откако Министерството за здравство на Израел објави дека е пронајдена можна поврзаност помеѓу оваа медицинска состојба кај младите мажи и вакцинирањето со Фајзер вакцината против КОВИД-19.

Оваа Агенција изјави дека се уште се истражува можниот ризик и дека се уште не дошла до конечен заклучок за причинско-последичната врска помеѓу вакцината и миокардитисот и перикардитисот.

Додека на некои пациенти им била потребна и хоспитализација, повеќето во целост се опоравени, нагласуваат од Центарот.

“Повеќе од половина од случаите на миокардитис и перикардитис во системот за следење на несакани ефекти во САД, откако пациентите примиле втора доза Фајзер вакцина или Модерна,  се случија кај лица на возраст меѓу 12 и 24 години“, информираат од Центарот.

Помалку од 9 проценти од вакцините биле администрирани во оваа возрасна група.

„Тука навистина постои нерамнотежа. Повеќето случаи се случиле во рок од една недела по вакцинирањето “, вели д-р Том Шимабукуро, заменик директор на Центарот за безбедност на имунизацијата при CDC.

Пријавени се 283 случаи на воспаленија на срцевиот мускул по втората доза на вакцина, кај оние на возраст меѓу 16 и 24 години, додека се очекувани помеѓу 10 и 102 случаи во возрасна група, велат од CDC.

Шимабукуро посочува дека системот VSD, уште еден што ја следи безбедноста на вакцините, утврдил зголемена инциденца на воспаление на срцевиот мускул кај возрасната група помеѓу 16 и 39 години по втората доза вакцина,  во споредба со процентот забележан по првата доза.

Израелското Министерство за здравство претходно соопшти дека открило можна врска помеѓу вакцината и мал број случаи на миокардитис кај помлади мажи кои примиле вакцина Фајзер. Центарот соопшти дека ќе одржи состанок на Советодавниот одбор за имунизација следната недела за понатамошно анализирање на доказите и проценка на ризикот од миокардитис по вакцинацијата со мРНА вакцини против КОВИД-19.

Фајзер изјави дека ја поддржува анализата на Центарот  но нагласува дека бројот е многу мал со оглед на тоа колку дози на вакцина се употребени.