Ако вашето бебе ве буди во 4 или 5 наутро и повеќе нема шанси да продолжи да спие – знаете колку е тоа исцрпувачко. Лесно е да помислите дека станува збор за фаза што едноставно треба да ја издржите.
Но, според педијатрискиот терапевт Ема Хабард, раното будење не е нешто со кое мора само да се помирите – постојат работи што можете да ги испробате.
Таа споделува три едноставни совети што би можеле да помогнат утринското будење барем малку да се одложи (и денот да не започнува пред зори).
Прво: Проверете колку вкупно спие бебето
Често се мисли дека колку повеќе бебето спие преку ден – толку подобро. Но, не е баш така.
На пример, бебе од околу 11 месеци има потреба од приближно 13 часа сон дневно. Ако преку ден спие 4 часа, ноќе ќе му треба помалку сон – и тука може да настане проблем. Ако заспие во 19 часот, сосема е можно да се разбуди веќе околу 4 наутро.
Затоа има смисла да обрнете внимание на дневните дремки и да се обидете да ги прилагодите така што ноќниот сон ќе биде подолг.
Второ: Не го „започнувајте денот“ прерано
Кога бебето ќе се разбуди рано, природно е да станете и да го започнете денот (особено затоа што веќе сте будни). Но токму тоа може да ја зацврсти таа навика.
Идејата е раното будење да го третирате како дел од ноќта – што помалку светлина, што помалку бучава и без вистинско расонување.
Не е секогаш лесно, но има смисла ако сакате бебето да не го поврзува 4 часот наутро со почеток на денот.
Трето: Дали може само повторно да заспие?
Бебињата природно се будат повеќепати во текот на ноќта. Разликата е во тоа што некои повторно заспиваат сами, а на некои им е потребна помош.
Ако бебето е навикнато да заспива со нишање, хранење или носење, голема е веројатноста дека истото ќе му биде потребно и кога ќе се разбуди среде ноќ или рано наутро.
И тука се појавува познатото сценарио: успева повторно да заспие во 1 и 3 наутро, но во 5 веќе нема шанси – едноставно е премногу будно.
Секако, секое бебе е различно и не постои магично решение што функционира веднаш. Но, понекогаш и малите промени можат да направат голема разлика.
