Децата често имаат болки во стомакот и во повеќето случаи причините се безопасни и не бараат понатамошен третман. Меѓутоа, во некои случаи потребно е да се реагира на болките и да се оди на лекар бидејќи некои состојби се доста сериозни.
Болките во стомакот кај децата се реферираат како чувство на непријатност и болка во пределот на стомакот, а може да бидат позиционирани насекаде помеѓу градите и препоните. Тие можат да бидат предизвикани од физички нарушувања, но и од некои психолошки состојби кои исто така бараат дијагноза и лекување. Со оглед на сите органи и органски системи кои се наоѓаат во него, не е невообичаено тоа што стомакот често е главно место на различни болки.
Помалите деца често не знаат точно да ја опишат болката што ја чувствуваат или да го покажат местото каде што всушност боли, поради што е важно родителите да знаат ја препознаат причината за болките, но и да сфатат кога е време да побараат лекарска помош. Во повеќето случаи, болката не е предизвикана од сериозен медицински проблем, но понекогаш може да биде знак за нешто сериозно.
Ако детето сè уште не знае да зборува, по неговото однесување едноставно можете да заклучите дали има болки во стомакот. Во овој случај, вашето малечко ќе се негодува и превртува повеќе од вообичаено, ќе ги дига нозете кон стомакот, слабо ќе јаде или дури ќе одбива храна. Може да се однесува вознемирено, да плаче неутешно или да биде безволно, што е исто така еден од почестите показатели дека детето е болно.
Кога да побарате медицинска помош?
Доколку болката не престане во рок од 24 часа или ако видите дека детето е во исклучително лоша состојба, тоа може да биде посериозна состојба како што се воспаление на слепото црево, жолчни камења, чир на желудникот, воспалителна болест на цревата, торзија на тестисите или јајчниците или инфекции на уринарниот тракт. Секоја од овие состојби бара медицинска интервенција бидејќи, ако се игнорира подолго време, може да настанат сериозни последици.
Самите лекари предупредуваат за кои симптоми е неопходно веднаш да се побара помош и да се однесе детето на преглед. Ова се симптоми како што се состојба во која вашето дете станало многу бледо или млитаво, поспано и тешко се буди, повраќа и притоа се јавува крварење или детето и понатаму чувствува силни болки без оглед на лековите против болки.
