Во студија објавена оваа недела во списанието Science, истражувачите од Институтот Френсис Крик во Лондон докажале дека клучните хормонални промени во мозокот се случуваат пред раѓањето на детето, односно за време на бременоста. Студијата покажала дека хормоните естроген и прогестерон влијаат на мозокот за време на бременоста, иако претходно се мислело дека промените се случуваат по породувањето.
Студија правена на глувци покажала дека тие развиваат „мајчински“ инстинкт веќе во доцната бременост. Причината е што споменатите хормони влијаат на нервните клетки во областа на хипоталамусот, кој е поврзан со родителството.
“Знаеме дека телото на жената се менува за време на бременоста за да се подготви за грижа за децата. Еден пример е производството на млеко, кое започнува многу пред породувањето. Но, нашето истражување покажува дека таквите подготовки се случуваат и во мозокот”, изјавил Џони Кол, водач на истражувачки групи.
