COVID-19. Д-р Крешимир Луетиќ објаснува: Колку мора да биде сатурацијата на кислород во крвта и кога е време да одите во болница?

Во принцип, заситеноста со кислород во крвта под 90% е индикација да се оди во болница, нормално е над 95%, но зависи и од возраста и здравствената состојба, објаснува д-р Луетиќ, претседател на Хрватската лекарска комора и интернист-гастроентеролог

Новите соеви се позаразни и ја забрзуваат епидемијата

♦♦♦♦♦♦♦

Д-р Крешимир Луетиќ, претседател на Хрватската лекарска комора и интернист-гастроентеролог, е еден од лекарите кои работат во загрепските болници, а кои доброволно се пријавиле на привремена работа во КОВИД- болницата во КБ Дубрава. Тој е таму десетина дена.

Д-р Луетиќ, во интервју за „Вечерњи лист“ зборува за тешката состојба на пациентите, но објаснува и колку мора да биде заситена крвта со кислород.

Д-р Крешимир Луетиќ, претседател на Хрватската лекарска комора

Сатурацијата на кислород во крвта под 90% е знак да одите во болница

„Кога ќе дојде средовечен или помлад пациент и на рендген ќе се види дека има пневмонија, но добра оксигенација или заситеност со кислород во крвта, се испраќа дома. Ако неговата општа состојба е задоволителна, ќе го прележи воспалението на белите дробови дома. Меѓутоа, таквите пациенти задолжително добиваат насоки, доколку почувствуваат краток здив или недостаток на воздух, да се вратат во болница. Би било добро пациентите да можат да ја мерат сатурацијата со оксиметар.

Во принцип, заситеноста со кислород во крвта под 90% е индикација да се оди во болница, нормално е над 95%, но зависи и од возраста и здравствената состојба. Кај млада, здрава личност, сатурацијата под 92% е индикација за зголемен мониторинг, а кај тежок бронхитичар 90% можеби е и нормална“, вели д-р Луетиќ.