Раѓањата со царски рез се почести отколку во претходните децении, но и покрај тоа, идните мајки имаат бројни дилеми кога станува збор за овој начин на породување. Она што многумина ги интересира е дали царскиот рез е поболен од природното породување, но на тоа прашање не е лесно да се одговори.
Првата важна работа е дека секој различно ја доживува болката, а втората важна работа што ја наведува акушерката Лизел Тин е дека споредувањето на овие два методи на породување е „како да споредувате јаболка и портокали“.
“Ако зборуваме за моментот кога бебето доаѓа на свет, тогаш вагиналното породување е поболно, особено ако не добиете епидурална. За време на царски рез се дава анестезија, што значи дека нема да морате да поминувате низ породилни болки и да го туркате бебето надвор”, објаснува таа.
Меѓутоа, опоравувањето по царски рез се смета за поболно од опоравувањето по природно раѓање.
„Тоа е поболно, подолго и обично потешко од закрепнувањето по природно породување, бидејќи е во прашање голема операција на абдоменот“, вели Тин.
Во овој поглед, таа наведува дека некои природни породувања се потрауматични и покомплицирани, што може да го продолжи закрепнувањето и да го направи поболно. Кога сè ќе се собере и одземе, нема јасен одговор дали да се претпочита царски рез или природно породување, бидејќи и двата методи вклучуваат одредена болка.
Дали боли давање анестезија?
Без разлика дали имате планиран или итен царски рез, ќе добиете некој вид на анестезија, во зависност од тоа што вашиот лекар ќе одлучи дека е најдобрата опција за вас. Во ситуации каде што е можно, спинална анестезија почесто се избира од општа анестезија, и се администрира во ‘рбетот и го вкочанува телото од градите надолу.
Медицинската сестра за плодност и бременост Андреа Блинт истакнува дека анестезијата е безболна, но „можеби ќе почувствувате нешто како штипкање кога ќе влезе иглата и чувство на печење, но тоа треба брзо да исчезне“.
Дали породувањето со царски рез боли?
Самото раѓање не е болно бидејќи анестезијата ја блокира болката, што значи дека идните мајки не чувствуваат сечење во стомакот или друга болка.
„Може да почувствувате притисок или ‘излекување’ на бебето, но не треба да чувствувате никаква болка“, вели Блинт. Доколку почувствувате болка, веднаш треба да му кажете на анестезиологот.
Дали боли вадењето конците?
Покрај закрепнувањето по царски рез, што загрижува многумина, некои идни мајки се плашат и дали ќе боли вадењето на конците од раната.
„Општо земено, отстранувањето на конците од раната по царски рез е безболно. Понекогаш некои жени чувствуваат чувство на влечење на кожата или благо штипкање ако шевовите се вметнати во кожата или мал притисок“, објаснува Блинт.
Мокрење по царски рез
Понекогаш може да се појави болка при уринирање после царски рез, а има неколку причини за тоа.
„За време на царски рез, лекарите го сечат стомакот во близина на мочниот меур за да го извадат бебето.
Исто така, неколку дена по царски рез, мајките може да почувствуваат болка за време на мокрењето поради претходно носење катетер, што може да ја иритира уретрата.
Секако е важно да се внимава на болката во деновите по царски рез бидејќи во некои ретки случаи може да укаже на инфекција.
Гасови по царски рез
Вообичаено е мајките да имаат гасови по царски рез.
„Анестезијата што се користи за време на царски рез може да ја забави работата на цревата и да доведе да остане заробен воздух во нив и во стомакот, а тоа може да предизвика интензивна болка од гасови“, објаснува Тин.
Понекогаш е потребна и една недела за да се нормализира функцијата на цревата по царски рез, а по тој период треба да престанат и стомачните болки поради гасови. Имајте на ум дека движењето колку тоа е можно по царски рез – ќе помогне да се ослободите од гасовите.
Болка во грбот после царски рез
Не е невообичаено мајките да искусат болки во грбот во првите неколку дена по царски рез, каде што добиле епидурална или спинална анестезија.
„Треба брзо да исчезне, а тие велат дека се чувствува како модринка“, објаснува Блинт, додавајќи дека ако имате некоја силна или долготрајна болка во грбот, таа најверојатно не е поврзана со самото раѓање.
„Најчеста причина за болки во грбот по царски рез или вагинално породување се должи на оптоварувањето кое телото го претрпело во текот на деветте месеци од носењето на бебето.
Болката во грбот треба да почне да се намалува во рок од 12 недели по породувањето, а доколку трае подолго, треба да се обратите на лекар.
