Делта плус сојот предизвикува помалку симптоми на Ковид-19, тврдат британските научници

Истражувањето на лондонскиот Империјал колеџ покажало дека подвидот на делта сојот се пренесува нешто полесно, но не предизвикува потешки форми на болеста или ги прави вакцините да бидат помалку ефикасни против него

Подваријантата на делта сојот на коронавирусот, која се повеќе се шири во Велика Британија, има помала веројатност да предизвика симптоми на болеста Ковид-19 кај заразените лица, покажало истражувањето на лондонскиот Империјал колеџ.

Резултатите покажале дека само една третина од заразените со подтип на делта сој познат како AY.4.2 развиле „класични“ симптоми на Ковид-19, додека кај оригиналниот делта сој (AY.4) речиси половина од испитаниците ги имале симптомите.

Кај луѓето заразени со делта плус сојот, две третини развиле какви било симптоми на Ковид-19, додека кај оние заразени со делта сојот, три четвртини имале барем еден симптом на болеста.

Истражувањето покажало дека подвидот на делта сојот се пренесува нешто полесно, но не се покажало дека предизвикува потешки форми на болеста или ги прави вакцините да бидат помалку ефикасни против него.

Истражувањето исто така покажало дека т.н. бустер доза на вакцината го намалува ризикот од инфекција кај возрасните луѓе за две третини во споредба со луѓето кои примиле две дози

„Се покажа дека е нешто полесно пренослив, но и дека е помалку симптоматски што е добро“, вели епидемиологот Пол Елиот.

Империјал колеџ веќе објави делумни резултати од истражувањето кои покажуваат дека оваа верзија на вирусот беше на врвот на ширење во октомври, а најмногу заразени имало меѓу децата. Комплетните резултати од истражувањето спроведено во периодот од 19 октомври до 5 ноември го потврдиле она што го покажувале дневните резултати – падот на дневниот број на заразени бил поврзан со училишните празници кон крајот на октомври.

Истражувањето исто така покажало дека т.н. бустер доза на вакцината го намалува ризикот од инфекција кај возрасните луѓе за две третини во споредба со луѓето кои примиле две дози.