Иако времето на враќање на старата телесна тежина за секоја жена е поинакво и зависи од бројни фактори (зависно од тоа колку килограми сте добиле во бременоста, доите или не, каква ви е исхраната и физичката активност), постојат одредени пресвртници кои можете да ги означите на календарот.
24 ЧАСА ПО ПОРОДУВАЊЕТО
Жените, речиси веднаш по породувањето, просечно губат по пет и половина килограми.
“Тука се бебето, изгубената крв течност, плодова вода. Во тој 24 часовен период, вашиот постпородилен стомак веќе почнува да се намалува. Со други зборови, голем процент од тежината од бременоста е самото бебе“, вели Сара Кригер, нутирционист кој работи со трудници и мајки.
ЕДНА НЕДЕЛА ПОДОЦНА
“Се уште од вас се елиминира многу течност во форма на урина, особено ако сте се породувале со епидурална анестезија“, додава Кригер, и вели дека тоа значи дека и натаму губите на телесна тежина, но советува да не се мерите. “Фокусирајте се на тоа како ви стои облеката, а не на тоа што покажува вагата“.
Доењето исто така игра улога во намалувањето на килограмите. Иако на жените им се советува да консумираат дополнително 500 калори на ден ако дојат, често губат многу килограми по породувањето, токму поради доењето.
“Жените губат килограни поради доењето оти доењето бара и ‘зема’ калории“, вели гинекологот Ешли Роман. Но, дополнува дека ова не важи за секоја жена и дека некоја ќе изгуби повеќе килограми од другите, без разлика дали дои или не.
ДВЕ НЕДЕЛИ ПОДОЦНА
Нутриционистката Кригер смета дека новите мајки не би смеело да се мерат првите две недели по породувањето, период во кој можеби се уште воспоставуваат рутина на доење, а хормоните штотуку почнуваат да се смируваат. Со други зборови, тие се уште се во т.н. “baby blues период“, во кој бројката што ја покажува вагата може да ве вознемири и лесно да ве расплаче.
“Бројката што ја покажува вагата обично не е слика што ја одразува вашата тежина, затоа не се обесхрабрувајте. Мерете ја половината со кројачко метри еднаш месечно за да ги следите сантиметрите, а не килограмите“, советува Кригер.
ЕДЕН МЕСЕЦ ПОДОЦНА
Можеби звучи предобро за да биде вистинито, но вообичаено е да новите мајки изгубат околу 9 килограми во првиот месец по породувањето. Со оглед дека на повеќето жени им се советува да за време на бременоста добијат 11-15 килограми, еден месец подоцна е многу веројатно дека речиси ќе се вратите на својата тежина пред бебето.
ШЕСТ НЕДЕЛИ ПОДОЦНА
Матката во целост се враќа во карличната шуплина, а вашиот стомак изгледа порамен и помал. “Ова е голема промена кога е во прашање стомакот по породувањето“, додава Кругер.
НЕКОЛКУ МЕСЕЦИ ПОДОЦНА
Ако одржувате здрави прехранбени навики, до кои сте се држеле и за време на бременоста, близу сте до својата нормална тежина. Ако сакате да го забрзате процесот, физичката активност сигурно ќе ви помогне во тоа.
ДЕВЕТ МЕСЕЦИ ПОДОЦНА
Кригер тврди дека постои вистина во често употребуваната фраза “9 месеци горе, 9 месеци доле“. Но, ако во бременоста сте добиле над препроачаните 11 до 15 килограми, ќе ви биде потребно малку повеќе време повторно да изгледате како пред бременоста. Само издржете!
