ДЕТЕТО ПОСТОЈАНО ВЕ ПРЕКИНУВА ДОДЕКА РАЗГОВАРАТЕ СО ДРУГИ ЛУЃЕ: Едноставен начин да го научите да почека додека завршите

Колку тоа и да ве нервира и постојано му велите на вашето дете тоа да не го прави, мора да признаете дека ова е манир што не го почитуваат ниту голем број возрасни, затоа треба да тргнете од тоа дека децата тоа не го знаат и треба да го научат.

Сигурно ви е познато чувството што ве обзема кога не можете да завршите реченица во разговор со некого, бидејќи детето постојано нешто ве потпрашува и прекинува. Колку тоа и да ве нервира и постојано му велите на вашето дете тоа да не го прави, мора да признаете дека ова е манир што не го почитуваат ниту голем број возрасни, затоа треба да тргнете од тоа дека децата тоа не го знаат и треба да го научат.

ЗОШТО ДЕЦАТА ИМААТ ПОТРЕБА ДА ВЕ ПРЕКИНУВААТ КОГА ЗБОРУВАТЕ СО ДРУГИ

Одговорот е многу едноставен – затоа што им е здодевно. Доколку не ги вклучите децата во разговорот, речиси е сигурно дека ќе ви поставуваат прашања без престан, колку заради забава, толку и за да привлечат внимание на себе. Друга отежнувачка околност за децата е тоа што обично немаат трпение, па кога ќе им кажете да почекаат да завршите, тоа за нив ќе биде вечност. Затоа, обидете се наместо да им кажете, всушност да им покажете на сопствен пример.

Можеби не го признавате или не сте свесни за тоа, но и вие имате тенденција да го прекинувате вашето дете ако зборува бавно, а вие сакате да направите нешто. Најдете време и трпение секогаш да почекате да заврши. Ако навистина мора да го прекинете, објаснете му дека остатокот од приказната ќе го слушнете малку подоцна.

УЧЕЊЕТО НА ТРПЕНИЕ Е ПРОЦЕС

Зборовите не се доволни, трпението треба да се научи. Колку е помало детето, толку потешко ќе се учи, но можете, на пример, да се договорите за некој знак што детето ќе го даде кога треба да каже нешто важно, а потоа вие да го почитувате својот дел и да го ислушате. Ако го прекинувате разговорот секогаш кога вашето дете ќе ве прекине, тоа ќе научи дека ова е најбрзиот начин да го привлече вашето внимание и ќе продолжи постојано да го прави тоа.

Внимавајте како ќе реагирате, не викајте, објаснете му со смирен тон дека не е убаво што ве прекинува и кажете му дека многу брзо ќе му одговорите. Ако детето продолжи да ве прекинува, едноставно игнорирајте го за да научи дека тоа не е начин да привлечете внимание. Кога детето ќе научи да биде трпеливо и да го почека својот ред, секако пофалете го за трудот, бидејќи така полека ќе ја стекне оваа позитивна навика.