Секое дете се развива со свое темпо, а тоа е општопознат факт. Но, родителите со повеќе деца, особено ако имаат и момчиња и девојчиња, сигурно ќе ви речат дека девојчињата се развиваат и созреваат побрзо од момчињата.
Се чини дека тоа е вообичаено мислење. Но, што велат педијатрите за тоа? Еве што одговараат педијатрите, на прашања поставени од родители за развојните пресвртници кај децата.
Кога зборуваме за развојот на детето, забележуваме развојни пресвртници во пет развојни домени – когнитивен, груба моторика, фина моторика, комуникација, социјално-емоционален развој. Но, како овој развој се разликува според полот?
Марк Фрајлих, педијатар, смета дека момчињата и девојчињата се развиваат подеднакво, а дека разликите помеѓу развојот на мозокот се суптилни и се однесуваат само на различни периоди на совладување на одредени вештини.
Значи, иако девојчињата и момчињата можат да развијат одредени вештини во различни временски рамки, тие на крајот сепак ќе се стигнат едни со други. Развојно-бихејвиоралниот педијатар Фадијла Допвел смета дека разликите во развојот меѓу момчињата и девојчињата најверојатно не се условени од полот. Таа вели дека треба да се земе предвид медицинската историја на секое дете, семејната историја и поддршката што ја добива во текот на развојните фази. Но, смета дека овие разлики би можеле да бидат резултат на различни фактори, од хормони преку генетика до искуството на кое детето е изложено во текот на развојот.
- Што е со моториката?
Но, иако некои статистики покажуваат дека девојчињата покажуваат порани достигнувања во фините моторички вештини, а момчињата имаат повисоки резултати кај грубата моторика, педијатарката д-р Шарифа Глас смета дека не се работи само за полови разлики, туку дека перцепцијата и влијанието на родителите се исто така важни.
- Вербални и социјални вештини
Некои истражувања покажуваат дека девојчињата се понапредни кога станува збор за развивањето вербални вештини. Сепак, д-р Глас напоменува дека тоа не може со сигурност да се утврди, а смета дека пресуден критериум е средината во која расте детето, како и неговиот психо-профил и карактер.
- Има ли разлика во физичкиот развој?
Многу е веројатно дека родовата разлика во физичкиот раст и развој ќе се види во текот на доенечкиот период, а потоа и во адолесценцијата. Во текот на првата година од животот, тежината, должината и обемот на главата се поголеми кај момчињата отколку кај девојчињата. “Се верува дека ова е поврзано со хормоналните разлики меѓу момчињата и девојчињата во оваа рана фаза од животот“, објаснува д-р Фрајлих.
