Бен Мекафети (34) кој има Даунов синдром се борел со вирусот две недели за конечно да го победи и во саботата да биде отпуштен од болница, пренесува британски „Метро“.
На снимките се гледа моментот кога Бен ја забележува својата мајка, Ди Маргерисон во одделот, пред да и се втурне во голема прегратка.
„Не мислев дека ќе успее. Тоа беше најдолго што некогаш сме биле раздвоени“, изјави неговата мајка. „Грижата што ја доби во болницата му го спаси животот. Не би можела да бидам повеќе благодарна“.
Бен бил примен во „Bradford Teaching Hospitals“ на 4 април, со рани симптоми на коронавирус.
Неговата здравствена состојба брзо се влошила и тој бил пренесен на палијативна нега. Неговата мајка и очувот Нил, од Бредфорд, Западен Јоркшир, биле оставени со мала надеж дека ќе се опорави. Ди останала со Бен првата ноќ во болницата, но поради ограничувањата врзани со коронавирус, болницата морала да ги запре посетителите кои доаѓаат во и од болницата.
Состојбата на Бен била толку тешка што во една фаза му биле дадени 24 часа живот, но успеал да преживее. Ди изјави дека нивното повторно обединување на влезот во болницата ја оставило без зборови и било многу емотивно. „Имавме огромна прегратка. Не очекував тоа да се случи“, изјави мајката.
Приказната на Бен е уште еден пример за неверојатно опоравување од Ковид-19.
