Проблемите со забите во бременоста се многу чести. Заради тоа, во периодот на бременоста од големо значење е да се води грижа за здравјето на забите и оралната хигиена. Доколку на време се открие, воспалението на непцата не мора да има никакви сериозни последици на мајката и детето.
Гингивитисот се јавува како последица од создавањето наслаги на забите и тогаш местото каде се наоѓаат наслагите станува подложно за развивање на бактерии. Кога бактериите ќе се размножат, може да дојде до отекување, чувствителност и крварење на непцата. Најпрво се воочува непријатниот вкус во устата. Покрај тоа, бремената жена може да чувствува и голема непријатна болка, особено додека ги мие забите. Доколку оваа болест на забите не се третира и не се излекува на време, може да доведе до парадентоза, при што забите ќе почнат да се клатат, а во потешки случаи и да паѓаат.
Значи, особено во бременоста, гингивитисот мора да се сфати и повеќе од сериозно. До гингивитис доаѓа бидејќи за време на бременоста во организмот се случуваат бројни промени, пред се, промени на нивото на хормоните и засилено струење на крвта. Заради овие промени трудниците може да станат чувствителни на бактерии. Забрзаната циркулација може да доведе до пречувствителност на непцата и нивно отекување.
Исто така, утринските мачнини може да влијаат на здравјето на непцата. Кога ќе дојде до повраќање, доаѓа и до зголемено лачење на киселини од желудникот кои може да ја оштетат забната глеѓ. Заради мачнините многу бремени жени се чувствителни на паста за заби и се случува да престанат да ја користат, што многу влијае на квалитетот на оралната хигиена. На сите трудници во овие случаи им се препорачува да го посетат својот стоматолог и да им го препуштат здравјето на забите на стручњаците.
