ПИШУВА:
Катерина Шекеровска-Димовска
katerina@pedijatar.mk
Вакцинацијата против сезонски грип е најефикасна заштита од ова заболување. Институтот за јавно здравје препорачува вакцинација на целото население, особено на лица кои припаѓаат на т.н. ризични групи (согласно препораките на СЗО) во кои се вбројуваат постарите лица (над 65 години), децата на возраст од 6-59 месеци, бремени жени, лица постари од 6 месеци со хронични болести и здравствени работници. Кога станува збор за вакцинација на децата против грип, родителите се уште имаат некои дилеми, кои ги разрешува д-р Славе Недељковиќ, специјалист педијатар во Здравствен дом Врање, Србија.
Д-р Недељковиќ, се наоѓаме во сезона на грип и настинки, а вистинскиот пик на грипот се очекува во јануари и февруари. Компликациите од грипот може да бидат навистина сериозни особено кај децата. Оттука, дали се препорачува нивна вакцинација?
Д-р Недељковиќ: Пред се, Ви благодарам што ме поканивте на интервју за Вашиот портал. Многу сум почестен и посебно ме радува што давам интервју и како некогашен студент на Медицинскиот факултет во Скопје пред 35 години.
Секако дека се препорачува вакцинирање на дечиња од грип, од најраната возраст – 6 месеци до 9 години. Деца од 6 месеци до 3 години се вакцинираат со 0,25 мл вакцина против грип, во антеролатерален дел на надколеницата, од 3 години па нагоре со 0,5 мл. На дечињата кои првпат се вакцинираат им се даваат две дози вакцина во растојание од 30 дена, потоа еднаш годишно.
Против грип не смеат да се вакцинираат деца со позитивна анамнеза кои се алергични на протеините од пилешко месо и јајца, ако се покажала алергија на претходно давање на истата вакцина, деца со невролошка болест Гилен Бареов синдром, деца помали од шест месеци и деца со акутна болест
Деца со намалена отпорност, метаболички, срцеви заболувања, бубрежни заболувања треба пред сите да се вакцинираат.
Кои деца не смеат да примаат вакцина против грип и дали истата може да предизвика одредени реакции, компликации?
Д-р Недељковиќ: Против грип не смеат да се вакцинираат деца со позитивна анамнеза кои се алергични на протеините од пилешко месо и јајца, ако се покажала алергија на претходно давање на истата вакцина, деца со невролошка болест Гилен Бареов синдром, деца помали од шест месеци и деца со акутна болест.
Вакциналните компликации се мошне ретки!
Нус појави се сувост на грлото, оток, болка, црвенило, ретки локални манифестации како несакани дејства, а поретко системски.
Кога родителот ќе забележи дека детето е малаксано, без апетит, без желба за игра ако е поголемо, има температура, болки во коските и мускулите, главоболки – треба да се јават на лекар!
Смее ли дете кое е настинато да прими вакцина против грип?
Д-р Недељковиќ: Лесна настинка не причинува пречка за давање на вакцина. Дечиња со акутна болест и фебрилна состојба не се вакцинираат додека не помине истата.
Кои се симптомите на кои родителите треба веднаш да реагираат кога станува збор за грип?
Д-р Недељковиќ: Кога родителот ќе забележи дека детето е малаксано, без апетит, без желба за игра ако е поголемо, има температура, болки во коските и мускулите, главоболки – треба да се јават на лекар!
Каква треба да биде исхраната на децата во зимскиот период и дали треба да излегуваат надвор (се разбира во денови кога воздухот не е загаден или на повисоки места) во услови на ниски температури?
Д-р Недељковиќ: Исхраната треба да се состои од повеќе течности, чорби, супи, млаки чаеви (не ледени), сокови, да не дехидрираат, и повеќе овошје и зеленчук, поради богатството на минерали и витамини за да го покачат имунолошкиот систем.
Секако дека треба да излезат на чист воздух, но не на температура под -10, и слоевито облекување.
