Минатата недела, лекари од северна Италија, пријавиле невообичаено голем број на деца помлади од девет години со тешки форми на ретката болест Кавасаки и позитивен наод на новиот коронавирус. Слично воочиле и лекарите од Велика Британија кои целата состојба детално ја анализираат.
Иако е одамна позната, се уште не се знае точниот причинител за Кавасаки болеста. “Инфективната хипотеза“ ги обвинува вирусите (поретко бактериите) дека покренуваат серија на имунолошки процеси во организмот. Ова се случува кај децата кои имаат предиспозиција токму за оваа компликација. Точно е дека генетиката има значајна улога и за тоа покажува фактот дека болеста почесто се јавува кај азиските народи, но ја има кај сите популации. Болеста може да трае од две недели до неколку месеци.
СИМПТОМИ НА КАВАСАКИ БОЛЕСТ
Кога детето има покачена телесна температура (над 38,5) подолго од пет дена и четири од следниве пет симптоми:
- Ситнозрнест осип по целото тело
- Зголемени лимфни жлезди на вратот
- Промени на нозете и на рацете (црвенило, оток)
- Црвенило на устата и јазикот
- Црвенило и на двете очи
Детето е многу вознемирено и нервозно. Кај некои деца се јавува пролив, повраќање и болки во стомакот и во зглобовите. По отприлика две недели од почетокот на болеста, почнува да се перути кожата на прстите на дланките и на стапалата.
Болеста главно ги зафаќа децата на возраст од шест месеци до 5 години. Почеста е кај машките деца, и оваа болест не спаѓа во групата на заразни болести и болно дете не може да ја пренесе на други деца.
