КОВИД-19: Колку брзо можете ПОВТОРНО да се заразите со SARS-CoV-2?

Повеќето луѓе кои ќе се инфицираат со коронавирус, без разлика дали имаат симптоми или немаат, произведуваат антитела и клетки кои се борат против вирусот. За оние кои се опоравиле, шансите за реинфекција се многу мали во првите три месеци по почетната инфекција

Најголем ризик за реинфекција е кога сме изложени на лица кои се асимптоматски

Болеста Ковид-19 е предизвикана од вирусот SARS-CoV-2, кој се смета за високо заразен вирус. Вирусот веќе не „нападна“ преку различни мутации, но не може да се исклучат ниту негови нови мутации во иднина.

Повторната инфекција со овој вирус е можна доколку не се држите до упатствата за превенција од инфекција со коронавирус. Од многуте превентивни мерки кои можат да ја намалат трансмисијата на Ковид-19, најефективни се носењето маски и честото миење на рацете.

Најголем ризик за реинфекција е кога сме изложени на лица кои се асимптоматски. Станува збор за луѓе кои се заразени со вирусот, но не покажуваат никакви симптоми

Што е реинфекција со коронавирус?

Кога некое лице ќе се зарази со коронавирус повеќе од еднаш, се вели дека тоа лице е реинфицирано со вирусот.

„Реинфекцијата со вирусот што ја предизвикува болеста Ковид-19 значи дека лицето било заразено, оздравело и подоцна повторно се заразило. По закрепнувањето од Ковид-19, повеќето луѓе ќе имаат некаков вид на заштита од повторна инфекција. Сепак, реинфекциите се појавуваат“, велат од Американскиот центар за контрола и превенција на болести (ЦДЦ).

Колку брзо можете повторно да се заразите со коронавирус?

Многу експерти го поврзуваат имунитетот со реинфекција.

Иако не постои дефинитивен одговор колку брзо можете повторно да се заразите со коронавирус, според последните податоци на ЦДЦ добиени од нивните истражувања, се покажало дека три месеци по прележување на болеста не е потребно повторно тестирање на лицето освен ако лицето не покажува симптоми на Ковид-19.

За време на последниот бран на Ковид-19, кој главно се должи на омикрон, повеќето инфекции се резултат на асимптоматски преносители

Друга студија пак вели: „Повеќето луѓе кои ќе се инфицираат со коронавирус, без разлика дали имаат симптоми или немаат, произведуваат антитела и клетки кои се борат против вирусот. За оние кои се опоравиле, шансите за реинфекција се многу мали во првите три месеци по почетната инфекција.“

„Ако сте имале блага инфекција и не сте имале многу добар имунолошки одговор, и се изложите повторно на голема количина вирус, повторната инфекција е дефинитивно можна“, вели д-р Томас Русо, професор и шеф на катедрата за инфективни болести на Универзитетот Бафало во Њујорк.

Како доаѓа до инфекција со коронавирус?

Инфекцијата со коронавирус се јавува кога некое лице е изложено на вирусот. Обично, коронавирусот се шири преку капки кои се создаваат кога заразеното лице кашла, кива или зборува. Токму затоа е важно да ги покриете носот и устата и да ги миете рацете.

Ако сте имале блага инфекција и не сте имале многу добар имунолошки одговор, и се изложите повторно на голема количина вирус, повторната инфекција е дефинитивно можна

„Вирусот може да се шири од човек на човек преку мали капки од носот или устата кога заразеното лице дише или кашла. Овие капки се лепат на предмети или површини околу некоја личност. Други луѓе може да се заразат со коронавирус со допирање на овие предмети или површини и потоа допирање на нивните очи, нос или уста. Луѓето можат да се заразат и со вдишување капки од заразено лице. Затоа е важно да стоите најмалку еден метар подалеку од човек кој е болен“, тврдат здравствените експерти.

Зошто е можна реинфекција со вирус?

Со се повеќе и повеќе заразени луѓе, вирусот е веќе длабоко навлезен меѓу популацијата. Најголем ризик за реинфекција е кога сме изложени на лица кои се асимптоматски. Станува збор за луѓе кои се заразени со вирусот, но не покажуваат никакви симптоми. За време на последниот бран на Ковид-19, кој главно се должи на омикрон, повеќето инфекции настанале поради асимптоматски преносители, пишува „Тајмс оф Индија“.