Бидејќи пандемијата сè уште не е запрена, д-р Санџеј Гупта, шеф на неврохирургија и професор по неврохирургија на Универзитетот Емори, во гостувањето на Си-Ен-Ен потсетува кои се местата на кои е најлесно да се заразите и да добиете Ковид-19.
„Навистина се работи за 4 локации на кои најмногу се пренесува вирусот“, посочува тој.
Еве за кои места се работи:
Хотели
„Во моментов, најдобриот начин да се заштитите од вирусот е да останете во сигурноста на домот, велат експертите од Американскиот центар за превенција и контрола на болести, а местото на живеење се однесува на куќата или станот што го делите со вашето семејство.
Хотелските соби претставуваат ризик токму поради тоа што низ хотелот минуваат голем број луѓе. Исто така, одмор во затворен простор со голем број луѓе, како што е колиба, може да биде место каде лесно може да се заразите.
Кафулиња и барови
Д-р Ентони Фаучи, водечки американски експерт за заразни болести и директор на Националниот институт за алергија и заразни болести, додава: „Треба сериозно да ја сфатиме важноста да носиме маски постојано, а не да се собираме во баровите“, кои ги нарече важен механизам за пренос на вирусот.
„Во светот, зголемувањето на бројот на заразени е директно поврзан со кафулињата, баровите и теретаните. Се чини дека овие места навистина можат да се наречат проблематични во моментов“, пишува магазинот „Nature“.
Се додава дека тим на експерти анализирал различни сценарија, како на пример отворање на некои места додека други се затвораат. Заклучиле дека отворањето на ресторан со полн капацитет резултирало со зголемување на заразата, а следуваат теретаните, како и кафулињата и хотелите.
Ресторани
Еден од најлесните начини да се заразите е да престојувате во затворени простории со странци кои немаат маска за лице. Јасно е дека треба да ја извадите маската за да јадете и затоа рестораните се толку проблематични.
„Кога рестораните имаат само затворен простор за јадење, а во време кога имаме голем број заразени луѓе, а вие ја симнувате маската, доаѓаме до проблем“, вели д-р Фаучи, кој додава дека моментално претпочита да нарачува храна.
Цркви
Иако нема забрани за собирање во црквите, тоа се места каде вирусот лесно може да се шири, па затоа е потребна претпазливост и мерки за заштита, како носење маски, дополнително миење на рацете и одржување дистанца.
