Логопедот Моира која е постојано актуелна на ТикТок со свои видеа предупредува на низа вообичаени грешки кои родителите често ги прават кога разговараат со своите деца, а кои ги спречуваат малечките да прозборат. На прво место апелира до родителите да не вршат притисок врз своите деца.
„Немојте постојано да му кажувате на детето „кажи го ова, кажи го она“. На тој начин го зголемувате притисокот и малку е веројатно дека детето ќе го каже зборот што го барате. Децата учат подобро кога зборовите се контекстуализирани и кога имаат смисла“, вели таа, советувајќи ги родителите само да се обидат да го користат посакуваниот збор во нивниот секојдневен јазик, наместо да ги тераат децата да го изговорат зборот што постојано го повторуваат.
На второ место им предлага на родителите да не зборуваат како бебиња.
„Немојте намерно погрешно да ги артикулирате звуците за да звучите како мало дете. Тоа не придонесува за способноста на детето да научи зборови и звуци соодветни на возраста.“
На крајот вели дека родителите треба да престанат да повторуваат само еден збор што детето го кажува.
„Кога родителите ќе му одговорат на бебето со истиот збор, разговорот завршува, што значи дека интеракцијата е завршена и детето не учи нови зборови. Кога детето ќе каже некој збор, проширете ја вербализацијата во потполна фраза со повеќе смислени зборови. Доследно применувајте ги овие три совети и гледајте како јазикот на вашето мало дете забрзано се развива“, заклучува таа.
