Лошиот здив кај децата не мора нужно да укажува на проблеми – понекогаш тоа е само знак дека треба да се зајакне оралната хигиена, но понекогаш може да биде последица на некои здравствени проблеми.
- Кога лошиот здив треба да ве загрижи
Непријатниот мирис од устата на детето не треба да ве загрижува доколку детето е активно, добро расположено, изгледа здраво – во тој случај, најверојатно, треба само да се зајакне оралната хигиена.
Но, доколку покрај лошиот здив забележите дека детето е летаргично, нема енергија, не е активно, треба да се обратите на лекар, вели педијатарот д-р Константин Елиновски, додавајќи дека во овој случај овие симптоми може да укажуваат на ацетонемичен синдром, односно на нарушувања во функционирањето на панкреасот.
- На што укажува лошиот здив?
Речиси по правило, лошиот здив се поврзува со кариес и ширење на бактерии. Родителите тешко кога можат, само по мирисот, да утврдат што е во прашање, освен во случај на ацетонемичен синдром.
Во повеќето случаи, мирисот се појавува наутро, поради фактот што во текот на ноќта устата се суши и микробите се размножуваат. Во овој случај, помага тоа што детето ги мие забите и пие вода, па мирисот треба да исчезне.
Непријатен мирис во устата може да се појави и поради гноен процес на крајниците и аденоидите. Исто така, доколку детето има лош здив, добро е да го однесете на стоматолог за да се исклучи кариес.
Ширењето на бактериите може да доведе до стоматитис, гингивитис, глоситис (воспаление на јазикот), забен кариес и други воспаленија.
- Како да се ослободите од непријатниот мирис
Ако детето има здрави заби и нема воспалителен процес во усната шуплина или фаринксот, но мирисот останува и по миењето на забите, зајакнете ја оралната хигиена. Околу 80 проценти од микробите не се присутни на забите туку на јазикот, затоа е важно да се мие јазикот како и внатрешноста на образите при миењето на забите.
