Авионот на „Ита Ервејс“ „Еирбус А321нео“ полета од Дакар за Рим ноќта помеѓу 29 и 30 април со 155 патници, но се врати со уште еден. На летот AZ855 родено е момче, Мохамед Алесандро. Капетанот на авионот, Алесандро Ванучи (52), вели дека екипажот не бил информиран дека меѓу патниците има жена во седмиот месец од бременоста. Во пилотската кабина, тој бил придружуван од првиот офицер Филип Стојменов (34), во пилотската кабина, пишува „Кориере дела Сера“.
Драмата започнала во 2:47 часот наутро по италијанско време. „Еден час и шест минути по полетувањето, ме повика шефицата на кабинскиот персонал и ми рече дека една патничка не се чувствува добро“, раскажува Ванучи. „Ја прашав како е и дали ѝ е потребна медицинска помош“. Настаните потоа се одвивале многу брзо. Само три минути подоцна, пристигнала нова информации: на патничката ѝ пукнал водењакот.
Помош на 10.000 метри
Додека кабинскиот персонал ја згрижувал жената, две патнички, на помош притрчале италијанската докторка Антониета Серино и француската медицинска сестра Анаис Жендрот. Нивната помош била клучна.
Во исто време, пилотите почнале да собираат метеоролошки податоци и информации за најблиските аеродроми на рутата. „Потоа отидов да ја проверам ситуацијата“, се сеќава Ванучи. Тој ја замолил докторката да ја процени состојбата и колку блиску е породувањето.
Тешка одлука над пустината
Во тој момент, пилотите се соочиле со два предизвика. Првиот бил неизвесноста. „Не знаевме во каква состојба ќе биде бебето бидејќи беше предвремено породување“, раскажува капетанот. Вториот проблем беше позицијата на авионот.
„Се наоѓавме над Мавританија, во пустинскиот регион на Западна Сахара“. Ванучи објаснува зошто ова било особено предизвикувачко: „Одлуката за пренасочување зависи од позицијата и фазата на летот. Нормално има соодветни алтернативни аеродроми по должината на рутата, но во овој случај бевме во изолирана област, па ситуацијата беше посложена“.
Враќање во Дакар
Откако ја процениле ситуацијата, пилотите одлучиле да се вратат во Дакар. Командантот веднаш го контактираше оперативниот центар во Рим преку сателит и побара службите за итни случаи да бидат подготвени да го примат авионот. „Размислував за мајката и детето и која беше најдобрата одлука во тој момент“, вели тој.
Момче родено на небото
Во меѓувреме, се роди момчето. Покрај името Мохамед, неговата мајка го крсти и Алесандро во чест на пилотот. „Ги информиравме патниците за среќниот настан и сите аплаудираа“, се сеќава пилотот. „Ова се емоции што ќе ги паметам до крајот на животот“.
Ванучи додаде дека ова е прв ваков случај во неговата кариера. „Сретнав разни здравствени ситуации за време на летовите, но ниту една не беше толку посебна и чувствителна“, рече тој.
Ова е исто така првото бебе родено на лет на Ита Ервејс. Откако слета во Дакар и беа згрижени мајката и детето, авионот го продолжи своето патување кон Рим неколку часа подоцна. Момчето, син на мајка од Сенегал, родено во мавританскиот воздушен простор во италијански авион регистриран во Ирска, стана најмладиот патник што завршил едно патување и започнал друго, патувањето на својот живот.
