Многу родители сакаат нивното дете да биде успешно во училиште и да има што подобри оценки. Иако на некои работи не може целосно да се влијае, наставниците истакнуваат неколку совети за родителите. Според нивното мислење, родителите можат да направат одредени работи за што поуспешно да го подготват своето дете за училиште. Еве за кои работи станува збор.
Учете го на почитување
Наставниците ги советуваат родителите да го научат своето дете за важноста на почитувањето уште рано во животот. Како што објаснуваат, важно е да се поттикне детето да ги стави играчките на нивно место по играњето, внимателно да се однесува кон книгите и играчките, да чека на ред и да биде нежно со животните. Тие исто така велат дека е многу важно да се разговара со детето за важноста да се почитуваат другите деца во одделението. Секој има право да учи, затоа прекинувањето на наставата го прекинува процесот на учење на сите, додаваат тие.
Читајте заедно со него
Наставниците советуваат дека родителите треба да му читаат на своето дете и заедно со него, секој ден. Како што објаснуваат, гласното читање и слушањето се одлични алатки за градење на вокабулар и вештини за читање со разбирање, кои исто така придонесуваат за подобар успех во училиштето.
Немојте наместо него да ги пишувате домашните задачи
Родителите треба да се спротивстават на нагонот да ги извршуваат домашните задачи на своето дете или која било друга задача поврзана со училиштето, советуваат наставниците. Имено, детето треба само да се труди, да греши и да се обиде повторно бидејќи само така ќе научи. Освен тоа, важно е детето да научи да биде упорно и да се справува со неуспехот, бидејќи токму така подоцна во животот ќе постигне добри резултати.
