Бројот на Ковид-19 случаи „експоненцијално расте“ низ цела Англија, пред се кај помладата и невакцинирана популација, велат научниците, но додаваат дека тоа нема да предизвика нов бран на епидемија во земјата.
Студија нарачана од британските власти покажала дека бројот на нови инфекции се зголемил за 50 проценти помеѓу 3 мај и 7 јуни, што се совпаѓа со ширењето на делта варијантата на коронавирусот откриена во Индија, а која сега доминира во Велика Британија.
Податоците од скоро 110.000 тестови на Ковид-19 направени низ Англија помеѓу 20 мај и 7 јуни покажуваат дека бројот на случаи се удвојува на секои 11 дена.
Бројот на Ковид-19 случаи „експоненцијално расте“ низ цела Англија, пред се кај помладата и невакцинирана популација
Резултатите од истражувањето беа објавени откако британскиот парламент одобри продолжување на ограничувачките мерки до 19 јули. Научниците од лондонскиот Imperial College истакнаа дека истражувањето открило „рапидна промена“ во последните неколку недели помеѓу алфа, односно британската варијанта и делта или индискиот сој.
Повеќе од 90 проценти од новите случаи на инфекција се поврзани со делта варијантата, објавија тие, но додаваат дека земјата е во поинаква ситуација од минатата есен кога експоненцијалниот раст го активираше вториот бран на епидемијата, бидејќи со проширувањето на кампањата за вакцинација ќе се спречи такво сценарио, пренесува „Хина“.
