Долгите и непроспиени ноќи веројатно се еден од најголемите предизвици во првата година со бебето. Откако ќе го нахраните бебето и ќе му смените пелена, тоа и натаму не спие, а тогаш неактивноста во текот на денот би можела да е главниот виновник.
Ова се тврди во најновото истражување на Универзитетот во Мичиген, каде биле проучувани 22 здрави бебиња на шестмесечна возраст во период од 24 часа, а било следено нивното ниво на физичка активност и сон. При тоа, било откриено дека бебињата кои се помалку активни преку ден, помалку спијат навечер.
Она што го предлагаат како решение стручњаците е дека колку повеќе време бебето поминува преку ден на стомак, толку повеќе проспиени ноќи ќе има и за него, и за мајката. Времето поминато на стомак се однесува на некој период во денот кој бебето треба да го помине во таа положба, под надзор на родителите и поттикнување на развојот на моторичките способности. Истражувањето се фокусирало токму на влијанието на физичката активност, како оваа, кај бебињата.
