Колку пати по породувањето сте застанале пред огледало и сте помислиле дека би сакале да го имате вашето „старо“ тело? Колку пати незадоволно сте погледнале во стомакот, колковите, нозете…? Доволно е да сте малку полошо расположени за да кулминира вашето незадоволство од себе. А кој на овој свет е воопшто совршен? Дури и најпознатите светски убавици, на кои многумина им се восхитуваат, признаваат дека тешко се справуваат со промените што ги оставила бременоста на нивните тела.
Како тогаш да го промените негативниот став кон вашиот физички изглед?
- Мали утрински ритуали
Секое утро кога ќе се погледнете во огледало кажете си дека сте задоволни со себе, дури, дури и кога сакате да изгубите два-три килограми. Најважно е да имате позитивен став, бидејќи од него доаѓа и вашата енергија за остварување на целите. Обидете се што помалку да гледате, а повеќе да го слушате вашето тело. Доволно сте се „потрошиле“ за да им угодувате на другите – отсега секој момент нека биде „ваши 5 минути“! Ако сакате да се истегнувате во кревет по будењето, направете го тоа. Во што спиете? Во стара маица, излитена ноќница…? Фрлете ги во ѓубре, купете привлечна долна облека… И разбудете ја скриената сензуалност. Освен што вашата кожа подобро ќе дише, ќе се спријателите си вашето тело.
- Бидете потолерантни кон себе
Психологот Стенли В. Садава кажува еден мудар факт: „Учиме толеранција кон религиите и расите, па дали е таков проблем да се биде потолерантен кон килограмите? Ова важи само доколку немате здравствени проблеми, но доколку тие ви претставуваат непријатност, „соберете“ ја сета љубов кон себе и ветете дека ќе работите на остварување на вашата цел. Покрај тоа, модата постојано се менува, а со тоа и идеалните пропорции. Сакајте ги вашите облини и бидете потолерантни кон себе.
- Проучете го говорот на телото
Ако научите да го сакате своето тело, ќе ја зајакнете и вашата самодоверба. И обратно. Никогаш не се сомневајте во вашите способности. Вие самите најдобро знаете колку можете да направите и постигнете. Па зошто да се замарате со туѓите стандарди. Немојте да си поставувате прашања од типот „Дали сè уште сум секси?“ Секако дека сте, бидејќи секој е привлечен на свој начин. За другите да ве доживуваат како личност која зрачи со сексапилност и шарм, мора прво да испратите такви сигнали до сопственото тело. Застанете пред огледало и вежбајте го држењето на телото. Застанете исправено, одете флексибилно, истакнете се…
