Клучни точки
- Новороденчињата можат да развијат конјунктивитис, познат како неонатален конјунктивитис, кој може да биде предизвикан од инфекција, иритација или затнат солзен канал.
- Оваа состојба може да доведе до сериозни здравствени проблеми ако не се лекува.
- Затоа, новороденчињата со симптоми на конјунктивитис треба веднаш да бидат прегледани од лекар.
Знаци и симптоми
Кај новороденчињата се јавува исцедок од очите во период од неколку дена до неколку недели по раѓањето.
Очните капаци може да бидат:
- отечени,
- црвени,
- болни/осетливи.
Причини
Причината за конјунктивитис кај новороденчињата често е тешко да се утврди, бидејќи симптомите се слични без разлика на причинителот. Може да биде предизвикан од:
- блокиран солзен канал,
- иритација од капките или мастите што се ставаат во очите веднаш по раѓањето,
- инфекција пренесена од мајката за време на породувањето.
Дури и мајки без симптоми можат да носат бактерии или вируси и да ги пренесат на бебето при раѓање.
Видови неонатален конјунктивитис
- Конјунктивитис предизвикан од нелекувана кламидија
Причина: Нелекувана кламидија кај мајката може да се пренесе на бебето при породувањето.
Симптоми:
- црвени очи,
- отечени капаци,
- гноен исцедок.
Инфекцијата може да се прошири и на:
- белите дробови,
- назофаринксот (делот што ги поврзува носот и устата).
Почеток: најчесто 5–12 дена по раѓањето (може и порано ако пукне воденикот при породувањето).
- Конјунктивитис предизвикан од нелекувана гонореја
Причина: Нелекувана гонореја кај мајката.
Симптоми:
- силно црвенило,
- густ гној,
- изразен оток на капаците.
Може да доведе до сериозни компликации како:
- инфекција на крвта (бактериемија),
- менингитис.
Почеток: 2–5 дена по раѓањето.
- Хемиски конјунктивитис
Причина: Иритација од капки/маст што се ставаат во очите за превенција.
Симптоми:
- лесно црвенило,
- благ оток.
Траење: обично поминува за 24–36 часа.
- Други форми на неонатален конјунктивитис
Причина: Вирусите што предизвикуваат генитален или орален херпес, како и бактерии различни од кламидија и гонореја, можат да предизвикаат конјунктивитис и сериозно оштетување на очите кај новороденчињата. Ова вклучува и бактерии што нормално живеат во вагината на мајката и не се сексуално преносливи. Такви вируси може да се пренесат на бебето за време на породувањето. Сепак, херпесниот конјунктивитис е поредок од оној предизвикан од гонореја и кламидија.
Симптоми: Црвено око и отечени очни капаци со присуство на гној.
Превенција
Мајките со генитален херпес треба да се консултираат со лекар за време на бременоста за да се намали ризикот од пренос на инфекцијата. Во повеќето земји постои обврска новороденчињата да добијат капки или маст во очите во првите 2–3 часа по раѓањето. Денес најчесто се користат антибиотски капки (најчесто еритромицин).
Кога да се јавите на лекар
Веднаш консултирајте се со лекар ако новороденчето има симптоми на конјунктивитис.
Ако бебето има инфекција
Лекарите можат да го третираат неонаталниот конјунктивитис предизвикан од бактериска инфекција со антибиотици. Третманот зависи од тежината на инфекцијата и од видот на бактеријата што ја предизвикала. Чистењето на инфицираното око на новороденчето со солен раствор (физиолошки раствор) ќе го отстрани густиот секрет кој се создава како одговор на инфекцијата.
Како се аплицираат антибиотиците:
- Како капки или маст за очи (топикално).
- Преку уста (орално).
- Преку вена (интравенски или IV).
- Како инјекција во мускул (интрамускуларно).
Лекарите можат да комбинираат топикални антибиотици (капки/маст) со некој од другите методи.
Ако бебето има блокиран солзен канал
Ако блокиран солзен канал предизвика „розово око“, нежна и топла масажа на делот помеѓу окото и носот може да помогне. Доколку солзниот канал не се отвори до првата година од животот, може да биде потребна хируршка интервенција кај бебето.
Третман според типот на конјунктивитис
- Конјунктивитис предизвикан од кламидија
Лекарите обично користат орални антибиотици за лекување на овој тип конјунктивитис.
- Конјунктивитис предизвикан од гонореја
Лекарите даваат интравенски (IV) или интрамускулни антибиотици. Доколку не се лекува овој тип на конјунктивитис, кај новороденчето може да се појават улцерации на корнеата (отворени рани на рожницата) и слепило.
- Хемиски конјунктивитис
Бидејќи овој тип е предизвикан од хемиска иритација (на пример, од капки за очи дадени по раѓањето), обично не е потребен третман. Состојбата кај новороденчето најчесто се подобрува во рок од 24 до 36 часа.
- Други бактериски и вирусни конјунктивитиси
За конјунктивитис предизвикан од други бактерии, лекарите обично препишуваат антибиотски капки или масти.
- За двата типа (бактериски и вирусен): топла облога на окото може да го намали отокот и иритацијата.
- Важно: задолжително измијте ги рацете пред и по допирање на инфицираните очи.
(Извор: CDC)
