НИКОГАШ НЕ ГИ ТРЕСЕТЕ БЕБИЊАТА: Мајка предупредува на страшните последици од синдромот на тресено дете

Жртвите се најчесто бебиња стари само неколку недели, но тресењето е крајно опасно за сите деца под пет години. Тоа придонесува за трајно оштетување на мозокот, а во 25 проценти од случаите последица е смрт на детето

Главниот предизвикувач на реакцијата во која родителите насилно го тресат бебето е обично неговото плачење

Синдром на тресено дете е назив за траума на главата што се случува кога најчесто во лутина поради непрекинато плачење, главата на детето неконтролирано се тресе, што доведува до внатрешно крвавење и најчесто фатални последици. Токму тоа и се случило на тримесечната Кристи Кук, која завршила во болница поради крвавење на мозокот после тресење, а три години подоцна и починала.

Оваа непромислена постапка на родителите остава неверојатно сериозни последици врз мозокот на детето и во повеќето случаи завршува со смрт. Совет до родителите: доколку во кое било време забележат дека плачот на нивното дете ги стресува толку многу што не можат да се контролираат, да го стават бебето на безбедно место, да ја напуштат просторијата и да одвојат неколку минути да се соберат

Поради проживеаното трагично искуство, нејзината мајка Сиера објави видео на Инстаграм за да ги предупреди родителите за фаталните последици од навидум безопасното тресење на детето.

„Мојата Кристи имаше само три месеци кога беше тресена. Само една минута потоа ги изгуби речиси сите телесни функции, престана да дише и голта самостојно, а го изгуби и видот. Освен тоа, и беа дијагностицирани епилепсија, церебрална парализа и гастритис, а секој оброк го примаше преку цевка за хранење. Три болни години се бореше за својот живот, а на крајот почина. Ја споделувам нејзината приказна за да се подигне свеста за синдромот на тресено бебе, поради кој моето девојче го загуби животот, но и да им дадам малку надеж на сите што го доживеале истото“, рече таа во видеото преку кое, како што вели, се обидува да ги предупреди другите родители случајно да не ја направат истата грешка.

Имено, тогашниот партнер на Сиера и таткото на девојчето бил оној којшто го тресел бебето, не знаејќи колку може да бидат сериозни последиците.

Зошто најчесто доаѓа до тресење на бебето и кои се последиците?

Како што објаснуваат експертите, главниот предизвикувач на реакцијата во која родителите насилно го тресат бебето е обично неговото плачење. Иако е доста вообичаено малите бебиња да плачат затоа што тоа е нивниот начин на комуникација со родителите, во комбинација со многубројните обврски и недостатокот на сон, често кај родителите предизвикува однесување кое поединецот не може соодветно да го контролира. Жртвите се најчесто бебиња стари само неколку недели, но тресењето е крајно опасно за сите деца под пет години. Тоа придонесува за трајно оштетување на мозокот, а во 25 проценти од случаите последица е смрт на детето.

Видеото на Сиера за кратко време стана вирално, а под него во коментар се јавија родители кои сочувствуваат со оваа мајка, како и еден рехабилитатор кој им дал совет на сите родители што да прават ако не можат да се контролираат кога бебето плаче.

„Во мојата кариера имав можност да работам со деца кои имаа синдром на тресено дете. Престрашно. Оваа непромислена постапка на родителите остава неверојатно сериозни последици врз мозокот на детето и во повеќето случаи завршува со смрт. Би ги советувал родителите доколку во кое било време забележат дека плачот на нивното дете толку многу ги стресува што не можат да се контролираат, да го стават бебето на безбедно место, да ја напуштат просторијата и да одвојат неколку минути да се соберат“, напишал рехабилитаторот.