Сите симптоми кај деца кои не навршиле една година, треба да се земат предвид сериозно, бидејќи тие многу лесно се разболуваат. Дури и кога детето нема јасни симптоми на болеста, родителскиот инстикт предупредува дека се случува нешто што не треба. Ќе забележите дека бебето е побледо од вообичаено, или дека често го менува расположението, или дека плаче почесто од обично. Сето ова, може да биде последица на некои дигестивни проблеми или избивање на заби, но тоа не значи дека овие ситуации се секогаш одговор на се. На пример, ако на бебето му излегуваат заби, може да се јават проблеми со непцата, но тоа никогаш не е причина за висока температура.
Прв чекор, ако забележите дека на детето не му е добро е мерење на телесната температура. Кај помалите деца инфекциите на грло се многу чести, што значи дека чекор два е да му се прегледа грлото. Но, тоа на мало дете не го правете сами, туку тоа нека го направи педијатар.
Организмот на разни инфекции реагира со создавање на дополнителни бели крвни зрнца, па затоа најдобро е нежно да го испипате делот под долната вилица на детето, се до нејзиниот спој со вратот. Ако во тој дел е било што отечено, веројатно станува збор за лимфните жлезди кои се активирани да се справат со можните инфекции.
Уште еден чест симптом на неколку инфективни болести кај децата е осипот, а први места каде се јавува се градите и кожата зад ушите. Осипот, заедно со зголемената телесна температура е речиси сигурен знак дека постои болест кај детето.
Најчести симптоми на болести кај децата
- Зголемена телесна температура
- Плач и чувствителност
- Повраќање и пролив
- Одбивање храна и пијалаци
- Воспалено грло
- Осип, чешање
- Зголемени жлезди на вратот или на спојот на долната вилица со вратот
