Во својот текст под наслов „Д-р Гугл не е ваш пријател“, д-р Сара Коноли, педијатар од Флорида, истакнува дека Гугл зазема место во нашите животи и дека не поминува ни ден, а и самата да не прогугла нешто, но потенцира дека д-р Гугл „почесто ќе придонесе за ваша поголема вознемиреност отколку да ја ублажи“.
Д-р Коноли наведува пример како илустрација.
„Ако напишете „треска и губење на килограми“ во пребарувачот, податоците што ќе ги добиете ќе бидат такви што веќе ќе почнете да го подготвувате својот тестамент пред и воопшто да одите во болница на преглед“, наведува таа.
„Не заговарам родителите никако да не користат интернет. Напротив, сега имаме можност да се едуцираме и информираме многу полесно од кога и да било претходно и тоа е одлично“, вели докторката.
Д-р Коноли нагласува дека е важно да се држите настрана од општите пребарувања. „Прашајте го вашиот здравствен работник на која веб-страница со медицински информации и верува. Постојат многу веб-страници кои изгледаат веродостојно и исфрлаат дезинформации спакувани многу формално, но кои само сакаат да ве преплашат или да ви украдат пари“.
- Докторката вели дека е добро да користите една или две веб-страници, па кога ќе ви затреба нешто да барате информации од проверени извори.
„Користете ги податоците заедно со вашиот педијатар или здравствен работник. Ако најдете нешто на тие страници што не ви е јасно, слободно поставете им прашања на своите лекари. Ако вашето дете има посебен медицински проблем, како што е дијабетес, прашајте го вашиот ендокринолог кои веб-страници им нудат на родителите најкорисна поддршка и информации, а потоа посетете ги“, нагласува д-р Коноли.
Оваа лекарка вели дека иако луѓето веруваат дека лекарите мразат кога пациентите гуглаат, тоа едноставно не е вистина.
„Ни се допаѓа што семејствата сакаат повеќе информации и што можат да им пристапат од дома. Ние само сакаме да имате сигурни, проверени информации и да сфатите дека д-р Гугл не е доктор кој е во вашиот дом и дека почесто ќе придонесе за ваша поголема вознемиреност отколку да ја ублажи“, додава докторката.
