Покрај големата возбуда, почетокот на училишната година носи и промени во ритамот на семејството. Од летната опуштеност се влегува во многу различни активности, но и обврски, па тој премин понекогаш може да биде извор на стрес и за децата и за родителите.
Враќањето во колосек и влегувањето во рутина, но враќањето на обврските, умее да ја замати сликата на одморот и да внесе немир. Како овој период сепак да мине со што помалку тензии?
За да се воспостават работните навики, по летнаиот распуст, важно е да постои договор кога што се прави. На пример, договорете се со детето веднаш кога ќе дојде од училиште да ја сработи домашната, она што само може, а потешкиот дел да го остави кога вие ќе можете.
Ова е исклучително важно за детето да има чувство дека има некој кој ќе му помогне и дека не мора се само, бидејќи тоа некогаш може да биде (непотребен) товар. Можете заедно да направите распоред и детето да нацрта нешто покрај секој предмет од кој ќе ја заврши домашната задача, или да удри печат, да штиклира, или било што што ќе му даде чувство на достигнување. Ова се едноставни нешта кои помагаат да се одржи мотивацијата и извршувањето да задачите да стане (забавна) рутина.
Но, имајте предвид дека голем предизвик за децата, па и за родителите е богатата понуда на вонучилишни активности. Уште првата недела до нив стигаат безброј информации и писмени и усни, и сето тоа е интересно, корисно и примамливо. Но, кога некаде од втората недела на септември ќе сфатат дека се запишале на јазик, карате, фолклор, фудбал и кошарка,јасно е дека од нешто ќе мора да се откажат. Децата често инсистираат на сите активности, ветувајќи дека навреме ќе ги извршуваат сите обврски околу училиштето, но и покрај најдобрата волја, тоа често не е можно.
