Раѓањето е најрадосниот момент во животот на секоја мајка. Но, покрај огромната среќа која го следи доаѓањето на новиот член на семејството, мајката е често во првите денови, па и недели по раѓањето збунета, уплашена и тешко се снаоѓа.
Ова се неколку појави кои може да предизвикаат загриженост кај жената, особено ако станува збор за прво дете, а кои се нормални и вообичаени.
- Бебето првите недели може да спие подолг период (околу шест часа), бидејќи е уморно. Но, не грижете се. Новороденчињата спијат и по 20 часа дневно.
- Вообичаениот физиолошки пад на телесната тежина по раѓањето се надоместува за 10. дена.
- Можно е кај бебето да се јави физиолошка жолтица по излегувањето од родилиштето. Во прашање е природна појава на негово прилагодување на надворешната средина кое трае околу 10 дена. Само често доете го детето. Ако жолтицата значајно се засилува или подолго време не минува, побарајте совет кај својот педијатар.
- Поради дејството на хормоните на мајката, кај бебето може да се појават: оток на млечните жлезди, вагинално крварење и комедони (бели, ситни точки по кожата). Сите овие промени спонтано поминуваат, најчесто по две недели.
Како минливи појави на адаптација може да се јави лупење и алергиски исип на кожата.
- Бебешката столица треба да биде златно-жолта боја, освен неколку дена по доаѓањето од родилиште, кога е зеленкаста. Доколку и подоцна често е зеленкаста и со оскудна содржина, значи дека бебето е гладно. Некогаш зелената боја на столицата може да биде резултат од исхрана со вештачко млеко, збогатено со железо. Бебето може да има и по неколку столици дневно (на почетокот и по секој подој), а подоцна може да нема и по 3-4 дена.
