Стриите, односно нивната појава најчесто се поврзува со бременоста, брзиот раст и развој или честите промени во тежината, но некои луѓе едноставно имаат генетски предиспозиции да ги добијат.
Стрии се црвенкави, виолетови, розови или кафеави (во зависност од тонот на кожата) ленти или набори кои се наоѓаат на градите, стомакот, задникот, колковите и бутовите. Стрии се всушност лузни кои настанале поради пукање на кожата, поради брзото зголемување на телесната тежина за време на бременоста. Овие ленти најчесто се појавуваат во групи со неправилна форма.
Најголем дел од жените со овој козметички проблем се сретнале за време на бременоста, најчесто во текот на втората половина од бременоста. Кожата многу брзо се проширува – особено во шестиот и седмиот месеци – и настануваат стрии. Трудниците кои носат близнаци или имаат голем плод имаат поголема веројатност за појава на стрии. Генетиката, исто така, е еден од клучните фактори за нивна појава – ако вашата мајка или сестра имала стрии, веројатно, ќе имате и вие.
