СИМПТОМИ НА АНЕМИЈА во бременоста и по породувањето

Нормално е да се има блага анемија во текот на бременоста. Анемијата или слабокрвноста се јавува кога во крвта е намален бројот на еритроцити или количината на хемоглобин, тогаш крвта нема доволно здрави црвени крвни зрнца за пренос на кислородот до ткивата во организмот на мајката и бебето.

За време на бременоста, телото произведува повеќе крв за да го поддржи растот на бебето, а ако не добивате доволно железо или други хранливи материи, телото можеби нема да може да произведе количина на црвени крвни зрнца што му е потребна за создавање на оваа дополнителна крв. Анемијата може да направи да се чувствувате уморни и слаби, а ако не се лекува или ако се работи за потешка анемија, тоа може да го зголеми ризикот од сериозни компликации.

Загубата на крв за време и по породувањето исто така може да предизвика анемија. Затоа е важно и доилките да ја лекуваат оваа состојба.

ЗОШТО СЕ ЈАВУВА АНЕМИЈА ВО БРЕМЕНОСТА?

За време на бременоста може да се развие анемија предизвикана од недостаток на железо, фолна киселина или се работи за недостаток на витамин Б12.

Недостатокот на железо е најчеста причина за анемија во бременоста. Анемија предизвикана од недостаток на железо се јавува кога телото нема доволно железо за да произведе соодветни количества хемоглобин, протеин во црвените крвни зрнца кој го пренесува кислородот од белите дробови во остатокот од телото. При ваква анемија, крвта не може да пренесе доволно кислород до ткивата во целотот тело.

Анемија предизвикана од недостаток на фолати. Фолната киселина е витамин кој природно се наоѓа во одредени видови храна, како што е зелениот лиснат зеленчук. На телото му е потребна фолна киселина за да создаде нови клетки, вклучително и здрави црвени крвни зрнца. За време на бременоста потребно е дополнително количество фолати, но понекогаш не се добива доволно преку исхраната. Тогаш телото не може да произведе доволно нормални црвени крвни зрнца за пренос на кислород до ткивата низ телото.

Недостаток на витамин Б12. На телото му треба витамин Б12 за да формира здрави црвени крвни зрнца. Кога бремената жена не добива доволно витамин Б12, нејзиното тело не може да произведе доволно здрави црвени крвни зрнца. Жените кои не јадат месо, млечни производи и јајца имаат поголем ризик од развој на недостаток на витамин Б12, што може да придонесе за оштетување на невралната туба кај детето или да доведе до предвремено породување.

РИЗИК ФАКТОРИ ЗА АНЕМИЈА ВО БРЕМЕНОСТА И ПО ПОРОДУВАЊЕТО

Сите трудници се во опасност од анемија бидејќи им треба повеќе железо и фолна киселина од вообичаеното. Ризикот е поголем ако се работи за повеќеплодна бременост, две бремености со мало растојание, често повраќање поради утринска мачнина, тинејџерска бременост, ако трудницата или доилката не јаде доволно храна богата со железо и ако анемијата била присутна пред бременоста. Многу жени губат многу крв за време на породувањето, а доколку за време на бременоста била присутна анемија, оваа состојба ќе продолжи и по породувањето.

СИМПТОМИ

Во раните стадиуми на анемијата, можеби нема да имате очигледни симптоми, а многу од нив вообичаено се појавуваат во бременоста без да се работи за анемија. Затоа, задолжително правете рутински тестови на крвта за да проверите дали имате анемија.

Најчестите симптоми на анемија за време на бременоста се:

  • Бледа кожа, усни и нокти
  • Чувство на замор или слабост
  • Вртоглавица
  • Краток здив, отежнато дишење
  • Забрзана работа на срцето
  • Проблеми со концентрацијата