Трамболината ја обожаваат децата, а ѝ се радуваат и возрасните. Но, зад големата забава се кријат и одредени опасности, на кои предупредува Пит Пидко, биомеханички инженер и универзитетски професор од САД, кој шест години ги проучувал трамболинските паркови.
Физиката на скокањето
„Откривме дека енергијата се пренесува меѓу површините за скокање на трамболината. Тоа всушност е една голема трамболина“, вели Пидко.
Тој објаснува дека поради непредвидливоста на површината, многу лесно може да дојде до повреди.
„Површината на трамболината ја менува висината. Дали некогаш сте згазнале во празно? Замислете ја таа ситуација на трамболина“, вели тој. Луѓето – а особено децата – можат да го повредат вратот, ‘рбетот и екстремитетите, бидејќи силата од движењето на трамболината се пренесува на нивното тело.
Дизајнот на многу трамболини е таков што енергијата од еден скокач се шири низ сите површини. Тоа може да предизвика скоковите да се удвојат или одбијат, при што се губи контрола и доаѓа до судири со други лица.
Никогаш не скокајте заедно
Пидко предупредува дека кога родител скока заедно со дете, може да пренесе огромна сила врз него.
„Повеќе трамболини поврзани заедно создаваат небезбеден пренос на енергија, што ја прави површината непредвидлива“, заклучува тој. Ова го објаснил преку пример од снимка направена во New Jersey, на која момче скокало со својот татко и поради силата на неговиот скок паднало и ја скршило бутната коска.
„Тоа е најдолгата и најсилната коска во телото. Потребни се околу 400 килограми сила за да се скрши. Кај дете, веројатно околу 200 килограми. Значи, таткото пренел околу 200 килограми сила на своето дете – и тоа со огромна брзина. Тоа е како некој да ве удри со чекан“, објаснува Пидко.
На опасностите од скокањето на трамболина предупредува и Крег Кук, лекар кој во болница лекувал околу стотина пациенти со сериозни повреди добиени во трамболински паркови.
„Имаше скршеници на нозе, раце, ‘рбет, како и разни повреди на главата. Некои од нив изгледаа како повреди од најтешките сообраќајни несреќи“, вели д-р Кук.
Инженерот Пидко уште еднаш апелира до родителите да бидат внимателни и да не ги оставаат децата без надзор.
