Добрата вест е дека податоците го одразуваат и она што експертите за јавно здравје го кажуваат веќе некое време. Децата се со помала веројатност од возрасните да бидат хоспитализирани поради COVID-19 и да умрат од оваа болест
Близу 2,3 милиони деца во САД се тестирани позитивно на COVID-19 заклучно со 7 јануари, според Американската академија за педијатрија (ААП).
Децата претставуваат 12,5% од сите случаи во САД, со стапка од 3.055 случаи на 100.000 популација, соопшти академијата. Оттаму информираат дека 171 000 нови случаи се идентификувани преку тестирање на децата само во минатата недела.
Неделниот извештај се базира на податоците собрани од ААП и Здружението на детски болници од 49 држави, Њујорк, Порто Рико и Гуам. Во повеќето држави, дефиницијата за „дете“ е во опсег 0-19 години.
Само 10 држави дале информации за тестирањето. Во тие држави, децата сочинувале помеѓу 6% -17,8% од вкупните тестови на државата и помеѓу 7,1% -25,9% од децата биле позитивни на COVID-19.
Добрата вест е дека податоците го одразуваат и она што експертите за јавно здравје го кажуваат веќе некое време. Децата се со помала веројатност од возрасните да бидат хоспитализирани поради COVID-19 и да умрат од оваа болест. Врз основа на информациите дадени од 24 држави и Њујорк, децата претставувале 1,2%-2,8% од вкупно пријавените хоспитализации на COVID-19. Само 0,2%-3,1% од сите случаи на COVID-19 кај децата барале хоспитализација.
Меѓу 42 држави кои даваат податоци за морталитетот од COVID-19, 13 држави пријавиле нула смртни случаи кај деца поврзани со вирусот. Државите кои пријавиле смртни случаи не забележале повеќе од 0,2% од смртните случаи кај деца меѓу сите потврдени случаи на COVID-19.
„Во овој момент, се чини дека тешката болест како резултат на COVID-19 е ретка меѓу децата. Сепак, има итна потреба да се соберат повеќе податоци за долгорочните влијанија на пандемијата врз децата, вклучително и начините на кои вирусот може да му наштети долгорочно на физичкото здравје на заразени деца, како и неговите ефекти врз емоционалното и ментално здравје“, пишува во соопштението на ААП, пренесува „Си-Ен-Ен“.
