Едномесечно бебе по грешка е вакцинирано во Турција против Ковид-19, но бебето е добро, изјави вчера докторот што ја следи неговата состојба, што е прв познат случај на вакцинација на доенче во светот кој ја вознемири јавноста.
Зафер Куругол, детски инфектолог изјави дека „поголем број“ доенчиња биле по грешка вакцинирани против Ковид-19 во здравствените установи и дека наскоро ќе биде објавена студија за тие случаи
„Едномесечно доенче во јули е по грешка вакцинирано против Ковид-19, наместо против хепатитис“, изјави за АФП Зафер Куругол, детски инфектолог на Егејскиот универзитет, кој ја следи состојбата на бебето.
Куругол рече дека здравствениот работник кој ја давал вакцината во околината на Измир веднаш ја увидел грешката и ги известил надлежните.
Детето итно било транспортирано во Универзитетската болница Еге, каде што било прегледано и му биле следени отчукувањата на срцето.
Лекарите го следеле една недела и не откриле никакви негативни последици.
„Ја напушти болницата потполно здраво, како што дојде… Дури и ги немаше несаканите ефекти што понекогаш ги имаат возрасните, како што е покачена температура. Мајката продолжи да го дои“, вели Куругол.
Бебето, кое денес има 4 месеци, е здраво и редовно го прегледуваат лекарите.
Тестовите покажаа дека бебето развило антитела на Ковид-19, информира инфектологот кој одби да каже со која вакцина било вакцинирано детето. Во моментов во Турција се користат две вакцини, Фајзер и КоронаВак.
На прашање на агенцијата „Франс Прес“, од Светската здравствена организација (СЗО) рекоа дека испитувањата се уште траат, но дека „се потребни повеќе докази за краткорочните и долгорочните ефекти на инфекцијата со вирусот SARS-CoV-2 кај децата и за безбедносниот профил на вакцината кај децата, како би се утврдиле предностите и ризиците од вакцинирањето“ на млади луѓе.
Лекарите го следеле бебето една недела и не откриле негативни последици од вакцината. Денес има 4 месеци, здраво e и редовно го прегледуваат лекарите
Компанијата Фајзер оваа недела објави дека во тековните клинички испитувања се вклучени и деца од шест месеци нагоре. Единствените податоци што ги објави Фајзер досега се однесуваат на вакцинирање деца на возраст од 5 до 12 години против Ковид-19.
Куругол на телевизија рече дека „поголем број“ доенчиња биле по грешка вакцинирани против Ковид-19 во здравствените установи и дека наскоро ќе биде објавена студија за тие случаи.
Турското Министерство за здравство најави административна истрага, пренесува „Јутарњи лист“.
