Книгите за родителство главно се фокусираат на бебешкиот развој и она што може да се очекува во одредена фаза. Но, секој раст на бебето и помага и на мајката да порасне и нешто да научи, особено ако е мајка за прв пат.
Раѓање на бебето – мама се учи на одговорност
Многу мајки се присетуваат на моментот кога по раѓањето на детето, сфатиле дека тие повеќе не се главната улога во нивниот живот. Сè уште сакале да ги прават истите работи како порано, да гледаат серии кога сакаат, да излегуваат кога сакаат и да бидат потполно слободни, но сега покрај нив има личност за која се целосно одговорни. Сознанието дека е нечија мајка истовремено ја исплашило, но и бескрајно ја израдувало секоја мајка.
Бебето почнува да јаде цврста храна – мама се учи на трпение
Многу мајки за себе ќе речат дека не се трпеливи и дека почнале да бидат трпеливи кога нивното дете почнало со дохрана. На почетокот детето ја одбивало секоја храна што ќе ја подготвеле, што од нив барало поголемо трпение за постојано да им нудат нови намирници и не ги изгубиле нервите кога децата ќе одбиеле. Тие морале да кријат своите фрустрации пред децата бидејќи настојувале да бидат истрајни во својата замисла.
Детето почнува да покажува лутина – мама се учи на емоционална регулација
Колку и да се трудиме да бидеме трпеливи со децата и да не реагираме веднаш, сепак сме само луѓе. Секој понекогаш се фрустрира, а детската лутина понекогаш доаѓа во најлошиот момент и станува тригер за нашите бурни реакции. Родителството е повик за постојана работа на себе, а регулирањето на емоциите е една од најтешките лекции што во одреден момент мора да се совлада за доброто на целото семејство.
Детето почнува да оди – мама развива одлична координација
Додека детето не почне да оди, секоја мајка не може да верува колку опасности има во нејзиниот дом. Одеднаш секоја просторија се чини како минско поле, а детето за краткоо време е секаде и на се. Никогаш како дотогаш мајката не е свесна за својата снаодливост и добра координација која во оваа бебешка фаза најдобро доаѓа до израз.
Детето почнува во градинка – мама учи да пушта
Мајката до градинка е вклучена во секој сегмент од животот на детето, од купување облека, јадење, избор на книги за читање и витамини. Затоа не е чудно што на многу мајки одењето на детето во градинка им паѓа многу тешко. Честопати тоа е првпат да мораат да го пуштат детето и да го остават некому на одреден период. Раздвојувањето е тешко, но важно и за мајката и за детето.
