СООР: Како се манифестира оралната кандидијаза? Зошто се појавува и како се лекува кај бебињата?

Инфекцијата може да се појави: при минување на бебето низ родилниот канал, за време на хранење со недоволно чист прибор за јадење, како и ставање на валкани раце и валкани предмети или играчки во уста.

Соор е габична инфекција на усната шуплина, која често се јавува кај бебињата и новороденчињата на слузокожата на устата и на јазикот. Се манифестира во форма на кружни, светло бели наслаги, кои имаат изглед на засирено млеко. Под овие наслаги се болни ранички. Децата отежнато јадат, понекогаш одбиваат храна или јадат помалку. Ако инфекцијата во устата, која е предизвикана од Candida albicans, се прошири на ждрелото, може да следи гадење и повраќање.

Инфекцијата може да се појави: при минување на бебето низ родилниот канал, за време на хранење со недоволно чист прибор за јадење, како и ставање на валкани раце и валкани предмети или играчки во уста. Неретко се случува соор да се појави и кај деца кои биле болни, па им паднал имунитетот, а особено кај малечките кои примале антибиотици. Инаку, проследена појава на оваа инфекција може да биде и пеленски осип.

Ако соор се појавил како последица на вагинална инфекција на мајката, тогаш неопходно е да се лекуваат и мајката и бебето. Терапијата е отстранување на соорот половина час пред хранење и тоа со раствор од сода бикарбона  (лажичка сода бикарбона на 100мл провриена и оладена вода). Прстот се витка со газа, се натопува со растворот и потоа внимателно се отстрануваат наслагите од слузокожата на устата. Белите дамки лесно се вадат, но понекогаш крварат.

Во секој слуачј, многу е важно истовремено бришење на дојките пред секој подој со споменатиот раствор. Кај упорните инфекции се користат лекови, по препорака на лекар.