“Знаеме дека децата и адолесцентите може да се заразат и можат да заразат и други лица. Знаеме и дека овој вирус може да биде смртоносен за децата, но и дека тие обично заболуваат од поблага форма на болеста. Би истакнал дека има многу малку тешки и смртни случаи од последици од КОВИД-19 меѓу децата и адолесцентите“, изјави директорот на СЗО, Гебрејесус.
“Податоците со кои располагаме укажуваат на тоа дека помалку од десет проценти од регистрираните случаи и помалку од 0,2 проценти од смртните исходи од болеста се воочени меѓу лица помлади од 12 години“, додаде првиот човек на СЗО.
Гебрејесус додава дека во секој случај потребно е да се спроведат дополнителни истражувања за факторите кои го зголемуваат ризикот од заболување од потешка форма на КОВИД-19 и смртен исход како последица од оваа болест, меѓу децата и адолесцентите. Но, потенцира дека потенцијално долгорочните последици на здравјето на оние кои биле заразени со новиот коронавирус се уште не се познати.
“И иако децата главно не заболуваат од потешка форма на КОВИД-19, тие страдаат на други начини“, изјави Гебрејесус.
