Светската здравствена организација (СЗО) предупреди дека во Европа постои мешана слика бидејќи бројот на нови случаи на Ковид-19 забавува во некои нејзини делови, вклучително и Италија и Шпанија, но и понатаму продолжува да расте во Велика Британија и Турција.
„Вкупно гледано, 90 проценти од случаите се од Европа и САД. Значи, сигурно се уште не сме дошле до врвот на пандемијата“, истакна денеска портпаролката на СЗО, Маргарет Харис, на брифинг во Женева.
СЗО ќе издаде упатства за земјите-членки подоцна во текот на денот, во кои се наведени шест чекори што треба да се преземат за да се олеснат ограничувањата, додаде таа.
„Најважно е дали вашата трансмисија е под контрола“, рече таа.
Харис истакнала дека Соединетите држави во моментов се „фантастичен партнер“, освен што се најголем финансиер во СЗО.
„Секогаш ќе има критика до организацијата. Важно е да се слушаат критиките, особено конструктивните критики“, додаде таа. „А нашата работа ќе продолжи без оглед на какви било прашања“.
Харис, исто така, оцени и дека за Ковид-19 „не треба да се очекува вакцина уште најмалку 12 месеци или подолго“.
