На возраст од околу една година детето почнува да ја разбира интонацијата, па по тонот на вашиот глас и начинот на кој му се обраќате ќе препознае дали нежно му се обраќате или го карате за нешто и соодветно ќе реагира со насмевка или плачење. Меѓутоа, тоа треба да почне да покажува реакција на своето име веќе на околу седум месеци, во смисла дека го препознава своето име.
Доколку детето не реагира на своето име, не треба да паничите, но ниту да го игнорирате, бидејќи тоа може да укажува на некои невролошки проблеми.
Кога детето ќе го слушне своето име, треба да:
- Ја врти главата кон личноста што го повикува или да погледне во таа личност
- Ја подигне главата, да се сврти или да се доближи до личноста која го вика, да ја погледне во очи
- Го промени изразот на лицето, да стане помалку нервозно ако се работи за личност што не ја познава.
Кога детето не реагира на своето име
Ако детето не реагира на своето име, важно е да се обидете да ја разберете природата на неговото однесување. А еве кои се најчестите причини за тоа:
- Аутизам
Децата со нарушувања од спектарот на аутизам, слушаат кога некој ги повикува по име, и тие можат да реагираат различно во зависност од интонацијата, гласноста и други фактори. Најчесто го игнорираат повикот, но можат и да остварат некаков контакт. Овие деца генерално имаат проблеми во интеракција со луѓето околу нив, па затоа можат селективно да реагираат на различни членови на семејството и познаници.
Кога станува збор за однесувањето на децата со аутизам, тие го доживуваат светот околу себе на поинаков, посебен начин, вклучувајќи звуци, простор, бои, форми, вкусови… Тие можат да бидат целосно рамнодушни кон звуците, вклучувајќи го и звукот на гласовите на родителите, па соодветно на тоа, тие не реагираат дури и кога мама или тато ги викаат по име.
- Проблеми со слухот
Слухот на бебето се тестира уште на рана возраст, но може да се случи некои проблеми да се појават подоцна, по инфекции, повреди и слично. Ако детето не реагира на своето име, можеби прво треба да се посомневате дали добро слуша и да го однесете кај специјалист.
- Лутина, игнорирање
Наједноставната и најбаналната причина зошто детето не реагира на името кога го викате е лутината. Внимавајте на лицето на детето кога ќе го повикате, тоа ќе ви го открие неговото расположение. Кога станува збор за бебињата, понекогаш тие не реагираат на нивното име ако се зафатени со нешто што многу ги интересира, па едноставно оставаат впечаток дека не ве слушаат.
- Алалија од сензорен и моторен тип
Алалија е нарушување на говорот, каде слухот и интелигенцијата се нормално развиени. Оваа состојба се развива кај деца под три години и може да биде придружена со нарушена координација или перцепција.
Говорот е под влијание на моторната и сензорната алалија. Кај моторниот тип, детето разбира се, но има потешкотии во зборувањето, што значи дека реагира на своето име, но не може да одговори.
Кај сензорната алалија, детето не разбира што му се зборува, не може да поврзува зборови со слики или вистински предмети. Говорот му се развива побавно, не си го препознава сопственото име и затоа не може да одговори.
Кога треба да одите на лекар?
Ако забележите какви било загрижувачки симптоми, добро би било да посетите лекар – порано е секогаш подобро отколку подоцна. Секако, покрај отсуството на реакција на името, причина да го однесете вашето дете кај специјалист се и следните симптоми:
- Проблеми со слухот – детето не реагира на звуци со различна јачина
- Проблеми со говорот и не разбирање што му се зборува
- Било какви атипични реакции – од игнорирање до врескање до хистерија
- Опсесивно повторување на некои дејства, звуци или движења
Пред да паничите затоа што детето не реагира на неговото име, обидете се да обрнете внимание на поголемата слика – дали детето се заиграло со нешто, дали навистина не ве слушнал од некои гласни играчки итн. Тоа што детето не реагира еднаш или двапати кога ќе го повикате по име не е причина за загриженост, но ако тоа постојано се повторува, тогаш навистина е подобро да побарате мислење од експерт.
