Александар Мишарин од Универзитетот Нортвестерн во Илиноис и неговите колеги ја анализирале течноста од белите дробови на 88 лица со тешка пневмонија предизвикана од инфекција со коронавирус.
Сериозните респираторни симптоми на Ковид-19 се последица на активноста на одредени имунолошки клетки, што може да предизвика долготрајно воспаление на белите дробови
Повеќето од овие лица имале голем број на одредени типови на Т-клетки во нивните бели дробови, кои припаѓаат на клетките на имунолошкиот систем и се клучни за одбраната на организмот од инфекции. Истражувачите исто така откриле дека скоро 70 проценти од алвеоларните макрофаги, имунолошки клетки кои се наоѓаат во малите воздушни вреќички на белите дробови, содржат вирус SARS-CoV-2.
Наодите сугерираат дека штом еднаш вирусот ќе влезе во белите дробови, може да ги зарази макрофагите, кои реагираат со создавање на воспалителни молекули кои привлекуваат Т-клетки, кои за возврат произведуваат протеин кој ги стимулира макрофагите да произведуваат уште повеќе воспалителни молекули.
Ова упорно воспаление на белите дробови може да доведе до последици опасни по живот и во принцип објаснува зошто во телото се појавува цитокинска бура, која го уништува целиот организам. Студијата е објавена во списанието „Nature“.
