Поради незрелоста на имунолошкиот систем, децата се поподложни на алергии на храна во текот на првата година од животот, кои често, паралелно со созревањето на имунолошкиот систем, „исчезнуваат“ до 3-тата година од животот. Иако секој може да развие алергија, таа најчесто се јавува кај деца со генетски предиспозиции – ако едниот родител е алергичен, веројатноста за алергија на детето е двојно поголема, а ако двајцата родители се алергични, веројатноста е четирикратна.
Затоа, се препорачува со дохрана да се почне полека и внимателно, односно секоја нова намирница да се воведува низ 3 или 4 дена и да се следи дали детето има реакција на неа. Првиот ден понудете му на бебето само 1 до 2 лажички каша со новата намирница, па доколку нема реакција, постепено зголемувајте ја количината.
КОИ НАМИРНИЦИ СЕ НАЈГОЛЕМИ АЛЕРГЕНИ?
• кравјо млеко
• јајца
• соја
• пченица (глутен)
• кикиритки
• јаткасти плодови
• риба и морски плодови
• агруми
• домати
ЗНАК ДЕКА БЕБЕТО ИМА АЛЕРГИСКА РЕАКЦИЈА:
- Промена на бојата на кожата
- Појава на пликови и осип на рацете, нозете, околу устата, на лицето или на задникот
- Водлеста дијареа
ШТО АКО СЕ ПОЈАВИ АЛЕРГИЈА?
На кравјо млеко – исфрлете го од исхраната кравјото млеко, сите ферментирани млечни производи (јогурт, ацидофил, кефир, сирење) и производи што содржат млеко.
На глутен – елиминирајте ги житарките што содржат глутен: пченица, јачмен, ‘рж, овес, кус-кус и никулци и сите производи што ги содржат овие зрна, т.е. глутен
На јаткасти плодови и кикиритки – исфрлете ги оревите, бадемите, лешниците, индиските ореви и кикиритките, но и производите кои ги содржат како корн флипс, чоколадо…
На соја – исфрлете ги сите производи на кои на декларацијата стои „соја, протеини од соја, соја лецитин“.
На риба и морски плодови – исфрлете ги од исхраната сите риби (и морски и слатководни) и сите видови ракови, алги и школки. Исфрлете го и рибиното масло.
На јајца – исфрлете ги сите производи од јајца како тестенини и бисквити.Исто така и производите на чија декларација пишува „јајце, јајце во прав, протеини од јајца, овалбумин, албумин“.
